Agjencia Kundër Korrupsionit (AKK) ka bërë hedhjen e shortin për kontrollin e plotë të pasurisë së zyrtarëve të lartë publikë.
Drejtori i AKK-së, Shaip Havolli ka treguar se janë gjithsej 4 769 zyrtarë të lartë të cilët do t’i nënshtrohet shortit për verifikimin e deklarimit të pasurisë.
“Bazuar në Ligjin për Deklarim të Pasurisë pasi të bëhen publike deklaratat e pasurisë nga zyrtarët e lartë fillon hedhja e shortit për ata zyrtarë të cilët do të jenë pjesë e kontrollit të 20 përqindëshit ku gjithsej janë 4769 persona, nga të cilit pas numrit përzgjedhës çdo i pesti do të jetë pjesë e këtij kontrolli”, tha Havolli.
Nga lista e përzgjedhur 955 zyrtarë të lartë do t’i nënshtrohen kontrollit të plotë të pasurisë.
Havolli po ashtu ka thënë se 2 për qind e zyrtarëve nuk e kanë deklaruar pasurinë.
“Prej ditës së hënë ngarkohen zyrtarët me raste dhe fillon procedura e verifikimit të deklaratave të pasurisë dhe përfundon në dhjetor. Ka deri 2 për qind të zyrtarëve që nuk e deklarojnë pasurinë, por trendi vazhdon të jetë i njëjtë”.
Kurse për gabimet e përfolura në media ai ka përsëritur se ato nuk janë lëshuar nga Agjencia, por nga vetë deklaruesit.
“Gjatë procesit të deklarimit mund të ndodhin gabime, por që ditët e fundit të përfolura në media nuk kanë qenë gabime të agjencisë por të vetë deklaruesit të cilët pastaj janë përmirësuar”, ka përfunduar ai.
