Me 28 nëntor 1997, Rexhep Selimi, Daut Haradinaj dhe Mujë Krasniqi, bënë daljen e parë publike si ushtarë të UÇK-së në fshatin Llaushë të Skenderajt, në varrimin e mësuesit Halit Geci, i cili ishte vrarë nga forcat serbe.
Në rrëfimin për Pressing, Daut Haradinaj, ka shpalosur detaje të asaj dite dhe ka treguar se përse ai ishte i vetmi prej tre ushtarëve të UÇK-së, që nuk kishte vendosur maskë dhe nuk e fshihte identitetin e tij.
“Kur u afruam ngatë, Rexha tha Daut ku e ke maskën. I thashë s’kam marrë maskë. Jo tha duhet maskën, jo jo i thashë nuk e qes maskën hiç. Ishin dy arsye, një sepse isha larg dhe bindja ime që atypëraty fytyra ime nuk identifikohet dhe e dyta që ishte e kjartë se Luan Haradinaj ishte vrarë në dyluftim e sipër dhe s’kishe ti me çka me fshehë”, ka thënë Haradinaj.
Haradinaj ka thënë se rolin kryesor për daljen publike të UÇK-së, e kishte komandanti më i shquar Adem Jashari, i cili po atë dite edhe e kishte dhënë një intervistë për një media, në cilësinë e udhëheqësit të UÇK-së.
“Dalja ishte porosi e qartë që UÇK-ja ekziston dhe është e jona. Rolin kryesor e ka pasë Ademi, legjenda Adem Jashari. Ademi doli legal përfundimisht, edhe e dhe nja intervistë për një gazetë të kohës. Intervistua doli më vonë”, tha Haradinaj.
Po ashtu, Haradinaj ka treguar se dalja e tij ishte spontane, si shoqëruesi i lexuesit të letrës.
“Pastaj u dakorduam që me dalë edhe publikisht në binë. Kush po e lexon letrën? Rexhep Selimi me një ose dy shoqërues. Pjesëmarrja e Dautit vije spontanisht. Pastaj kur kam shku në binë, s’kam pasur uniformë me vete, kam qenë civil dhe uniformën ma ka dhënë Musë Jashari”, rrëfeu ai.
