Avokati i familjes Osmani thotë se ndaj Marigona Osmanit, 18-vjeçares e cila u vra në Ferizaj, është ushtruar dhunë.
Derisa raporti i plotë i autopsisë për vdekjen e Marigona Osmanit nuk ka përfunduar, për 18-vjeçaren tashmë është lëshuar certifikata e vdekjes që e kanë pranuar familja.
Avokati i familjes, Gazmend Rexhepi thotë se raporti i Institutit të Mjekësisë Ligjore tregon se 18-vjeçarja vdiq në mënyrë të dhunshme.
“Shkaktari i vdekjes përmendet të jetë politrauma ose në përkthim i bie që ka pas thyerje gjatë vdekjes”, ka deklaruar për RTV Dukagjinin Gazmend Rexhepi.
Ai thotë se edhe deklarata e të dyshuarit tjetër Arbër Sejdiu dëshmon se ka pasur dhunë ndaj Marigonës.
“Vet Arbëri ka përmend se ka pasur dhunë fizike e psiçike. Ai e ka pranuar se ka pasur britma të mëdha dhe se ka qenë në dhomën tjetër të banesës derisa ka ndodhur kjo dhunë”, ka deklaruar tutje Rexhepi.
Por ndryshe shprehet avokatja e të dyshuarit Arbër Sejdiu, Nora Shefkiu, e cila thotë se është keqinterpretuar deklarata e klientit të saj.
“Klienti thotë se ka qëndruar gjatë gjithë kohës jashtë dhomës së çiftit. Ai thotë se gjatë gjithë kohës ka dëgjuar zhurma, por nuk e specifikon çfarë zhurma ka dëgjuar. Avokati i familjes (Gazmend Rexhepi) i ka keqinterpretuar këto deklarata duke thënë se “Arbëri ka dëgjuar britma e kinse nuk ka reaguar””, deklaroi avokatja Nora Shefkiu.
