Profesori universitar Blerim Latifi, ka thënë se Zoran Zaev ka dhënë dorëheqje nga pozita e kryeministrit të Maqedonisë së Veriut, për shkak se nuk mund të përballojë sfidën identitare të vendosur nga Bullgaria.
Ai ka thënë se humbja në zgjedhjet e mbajtura dje, ishte pretekst për ikjen nga kjo barrë, përcjell Bota ot.
Sipas tij, Zaevi mezi ia doli ta përballonte marrëveshjen e emrit me Greqinë.
Reagimi i Latifit në Facebook:
Shumë njerëz dorëheqjen e Zaevit e kuptuan si veprim të një lideri që merr përgjegjësi për humbjen në zgjedhje. Por, ky veprim i Zaevit nuk besoj se reflekton ndonjë besim të tij në etikën demokratike.Në Ballkan nuk merret seriozisht ky term.Zaevi mezi ia doli ta përballojë marrëveshjen e emrit me Greqinë dhe, sigurisht, ai e dinte se nuk do të mund ta përballojë edhe një sfidë tjetër, po aq të rëndë: sfidën identitare të vendosur nga Bullgaria, e cila shtetit të tij ia ka mbyllur dyert e integrimit europian. Humbja në zgjedhje ishte pretekst fantastik për të që t'i ikë kësaj barre mbytëse.
