“Vetëvrasje”, është dëgjuar duke thënë ministri i Brendshëm, Xhelal Sveçla, për rastin e doganierit Luan Berisha që ndërroi jetë në muajin prill të këtij viti. Vdekja e tij është cilësuar e dyshimtë dhe ndodhet ende nën hetime nga Prokuroria e Shtetit.
Laura Berisha, motra e të ndjerit Luan Berisha, i cili ishte gjetur i vdekur më 17 prill në lagjen Vetërnik, derisa ishte zyrtar i Doganës, i ndërpreu rrugën kryeministrit Albin Kurti me vartësit e tij.
Berisha kërkoi nga qeveritarët informacione, për siç e quajti ajo, vrasjen e vëllait.
Ministri i Financave, Hekuran Murati i tha se me këtë duhet të merren organet e rendit.
Ndërsa, kur motra e të ndjerit u largua ministri i Punëve të Brendshme, Xhelal Sveçla, i dha sqarime kryeministrit Kurti duke i thënë se Luan Berisha u vetëvra.
Por, edhe pas 7 muajve nga Prokuroria Themelore në Prishtinë nuk e pohojnë as mohojnë asnjërin version, veç se thanë se janë duke bërë hetime në koordinim me policinë.
