Një postim i avokatit Arianit Koci, lidhur me bashkimin kombëtar, ka nxitur reagimin e analistit Nexhmedin Spahiu.
“A bëhemi 1000 persona deri më orën 24.00, që e dëshirojmë bashkimin me Shqipërinë? Zemra e ka vlerën e 2 like!”, ka shkruar avokati në llogarinë e tij në Facebook.
Atij i ka reaguar analisti Spahiu, i cili këtë propozim, e ka quajtur “ngulje thikë pas shpine të Kosovës”, pasi një gjë e tillë, sipas tij, nuk do të ndodhë.
“Edhe 1.000.000 me u ba se kjo gjë nuk do të ndodhë. E vetmja gjë që mund të bëhet me këto propozime e këto llajke është ngulje thikë pas shpine shtetit të Kosovës. Por, shteti i Kosovës i mbijeton këto sulme edhe në 500 vitet e ardhme”, ishte replika e Spahiut, ndaj Kocit.
Por, avokati nuk është ndaluar, duke ia përmendur Spahiut rastin e Gjermanisë.
“Shumë gabim je. Kush ka humb në rastin e Gjermanisë? Apo ajo është diçka tjetër - sipas teje”, ka pyetur ai.
E analisti politik është kundërpërgjigjur, duke thënë se po të ndodhte rasti i Kosovës dhe Shqipërisë si ai i Gjermanisë, ato “do të shpenzonin energji duke luftuar njëra-tjetrën”.
“Në rastin e Gjermanisë, Gjermania Perëndimore thjeshtë e ka gëlltitur Gjermaninë Lindore. Këtu as Shqipëria nuk e gëlltite dot Kosovën e as Kosova Shqipërinë. Thjeshtë nëse kjo ndodhë, po shyqyr nuk ndodhë, dy Shqipëritë do të shpenzonin energji duke luftuar njëra-tjetrën”, ka komentuar Nexhmedin Spahiu.
Replikat e tyre vijnë, pas deklaratës së kryeministrit të Kosovës Albin Kurti, i cili ka thënë se do të votonte pro bashkimit me Shqipërinë, në rast të organizimit të ndonjë referendumi demokratik./Botasot
