Nasuf Bejta, i cili në zgjedhjet e 14 shkurtit garoi në listën e Lëvizjes Vetëvendosje me numër 64 dhe ishte përfaqësues i Iniciativës së Vjosa Osmanit në listë, pritet të zë vend në Kuvendin e Kosovës.
Bejta do të marrë postin e deputetit pasi ta zëvendësojë Fitim Ukën, i cili pritet ta lirojë këtë pozitë.
Bazuar në rezultatet e bëra publike nga Komisioni Qendror i Zgjedhjeve, Nasuf Bejta rezulton të ketë mbledhur gjithsej 5,763 vota në zgjedhjet parlamentare të vitit 2021.
Përveç garës për Asamble të Përgjithshme, Bejta kishte hyrë edhe në një garë tjetër vitin e kaluar si kundërkandidat i Vjosa Osmanit në garën për president të Republikës së Kosovës.
Në këtë garë me Osmanin, e cila fitoi bindshëm Bejta nuk mori asnjë votë nga 82 deputetët që votuan në raundin e tretë të votimit në seancën e 4 prillit.
Deputeti i LVV-së, Fitim Uka, ka vendosur të lirohet nga përgjegjësia e deputetit për të vazhduar me ligjërime në Fakultetin Filozofik të Universitetit të Prishtinës.
Ky vendim i Ukës është marrë pasi ligji nuk ia lejon të punojë në të dyja drejtimet njëkohësisht.
