Serbët në Kosovë sot kanë mbajtur protesta përshkak se kryeministri i Kosovës, Albin Kurti ua ka ndalua që të votojnë në zgjedhjet e 3 prillit në Kosovë.
Pas kësaj proteste të serbëve ka reaguar kryetari i Republikanëve të Kosovës, Faton Kurti, i cili thotë se Vuçiqi si një diktator i vogël ka marr dritën jeshile nga diktatori rus Vladimir Putin.
Ai thotë se këto protestat e serbëve kanë qëllim që të provokojnë incidente dhe eskalim të situatës në Kosovë.
E pas eskalimit sipas tij, pritet edhe intervenimi ushtarak serb në Kosovë dhe për të grabitur veriun e Kosovës.
Ai shton se, çdo tentim i Serbisë që të ndërhyjë në Kosovë ushtarakisht do të jetë gabim fatal për shtetin serb.
Reagimi i Faton Kurtit:
Pasi diktatori i vogël Vuçiq ka marrë dritën jeshile nga diktatori Putin për të tensionuar situatën, në Ballkan kanë nisur të gjëmojnë daullet e luftës.
Menjëherë kemi patur një seri kërcënimesh me luftë ndaj Republikës së Kosovës direkt nga krerët e shtetit serb, Vuçiq dhe Vulin.
Hapi i radhës i planit të tyre djallëzor, janë protestat e serbëve të orkestruara direkt nga Beogradi dhe të organizuara nga "Lista Serbska". Këto "protesta" kanë vetëm një qëllim, provokimi i incidenteve dhe eskalimi i situatës në Kosovë dhe pastaj për të intervenuar ushtarakisht.
Asnjëherë në historinë e njerëzimit nuk ka ndodhur që agresori i cili e humbi luftën të kërcënojë prapë me luftë (pa u tharë ende gjaku i të vrarëve 23 vite më parë).
Paramendoni sikurse Gjermania pasi e ka humbur luftën e dytë botërore të kërcënojë me luftë Francën!
Është shumë e qartë se Vuçiq ky minidiktator, po tenton të shfrytëzojë luftën në Ukrainë për ti realizuar qëllimet djallëzore ndaj Kosovës si grabitjen e pjesës veriore të Kosovës.
Si duket serbët e kanë harruar se sot Kosova nuk është ajo e viteve të 90-ta.
Çdo tentim ì Serbisë që të ndërhyjë ushtarakisht në territorin e Kosovës do të jetë një gabim fatal për Serbinë.
Është shumë për tu çuditur, sesi një popull i cili i në të kaluarën i ka humbur të gjitha luftrat prapë dëshiron ti hyjë një rruge së cilës kurrë nuk mund ti dalin në krye!
I bëj thirrje qytetarëve serbë të Kosovës, mos të bien pre e politikave radikale shkatërruese të Vuçiqit dhe qeverisë së tij.
Mos e bëni gabimin e njëjtë si në vitet e 90-ta sepse atëherë nuk do të lini më asnjë mundësi për bashkëjetesë me shqiptarët në një shtet.
