Burimet e gazetës "Bota sot" bëjnë të ditur se ekipet e Prokurorisë Speciale të Dhomave të Specializuara ndodhen në Kosovë për arrestime të reja.
Zyra e Prokurorit të Specializuar në Hagë (ZPS) shumë shpejt të arrestojë dy komandantë të njohur të Ushtrisë Çlirimtare të Kosovës (UÇK), bëjnë të ditur burimet.
Sipas burimeve të mirinformuara ata dyshohet se kanë kryer krime në rajonin e Drenicës, konkretisht në fshatin Likovc dhe në zonat tjera të operativës së Drenicës.
Ata janë emra të njohur për redaksinë, për çka Zyra e Prokurorit të Specializuar në Hagë (ZPS) i ka hetuar prej themelimit e deri tash.
Media, ka komunikuar me këta dy persona por asnjëri prej tyre, nuk ka dashur të flasë.
Shtatë ish-udhëheqës politikë e ushtarakë të Ushtrisë Çlirimtare të Kosovës (UÇK) po mbahen në paraburgim në Hagë.Ata akuzohen për një sërë veprash, nga ato për frikësim të dëshmitarëve që rëndojnë mbi ish-krerët e Organizatës së Veteranëve të Luftës e deri te vrasjet dhe trajtimi mizor i njerëzve, për të cilat akuzohen ish-krerët e UÇK-së si Hashim Thaçi, Kadri Veseli, Jakup Krasniqi, Rexhep Selimi e Salih Mustafa.
Gjykata Speciale heton krimet e pretenduara të pjesëtarëve të Ushtrisë Çlirimtare të Kosovës, të kryera ndaj pakicave etnike dhe kundërshtarëve politik të cilat përmenden edhe në raportin e Këshillit të Evropës të vitit 2011, autor i të cilit ishte një senator zviceran, Dick Marty.
Gjykata Speciale u themelua me vendimin e parlamentit të Kosovës në gusht të vitit 2015.
Gjykata financohet nga Bashkimi Evropian, punon dhe vepron në bazë të ligjeve të Kosovës, ndërsa vendosja e saj në Hagë është bërë, sipas qeverisë së Holandës, për faktin se “dëshmitarët mund të ndjehen të kërcënuar nëse proceset gjyqësore do të zhvilloheshin në Kosovë”.
