Protesta e veteranëve të UÇK-së pasi Qeveria i la jashtë Projekligjit për pagën minimale është përcjellur me reagime të shumta. Kryetari i Këshillit për mbrojtjen e të drejtave të veteranëve, Xhevdet Qeriqi, thotë se shpreson se do të kenë takim me kryeministrin Albin Kurti dhe që i njëjti ta kuptoj që veteranët duhet të trajtohen më dinjitetshëm.
Qeriqi thotë se veteranët duhet të përfshihen njëherë në Projektligj e pastaj të bëhet riverifikimi i listave.
“Po shpresojmë që do të ketë takime të tjera dhe do ta kuptoj edhe kryeministri që veteranët e luftës meritojnë të trajtohen më dinjitetshëm dhe përfundimisht, sidomos në këtë kohë të përfshihen në këtë ligj të pagës minimale, më pas të punohet për ndryshimin e ligjit dhe pastrimin ose riverifikimin që e ka thënë kryeministri”, tha ai.
Ai shtoi se nga kryeministri Kurti presim veprime konkrete, e jo siç thotë ai, deklarime në media.
“Presim që të merr edhe vendime sepse unë i kam pasur dy takime çdo herë e kemi diskutu, ne i kemi dhënë mbështetjen për riverifikim, mirëpo nuk ka ndonjë veprim konkret. Ne po presim veprime konkrete jo vetëm deklarime në media”, deklaroi Qeriqi.
