Në margjina të pjesëmarrjes në tryezën vjetore të 26-të të organizuar nga prestigjiozja britanike The Economist, kryeministri i Republikës së Kosovës, Albin Kurti, takoi emisarin e Mbretërisë së Bashkuar për Ballkanin Perëndimor, Sir Stuart Peach.
Sipas një njoftimi të Qeverisë, zhvillimet në Kosovë në rajonin e Ballkanin Perëndimor ishin tema kyçe të takimit.
Kryeministri Kurti e njoftoi emisarin për reformat e nisura, duke theksuar përkushtimin e Qeverisë së Republikës së Kosovës për zhvillim ekonomik, reformë në drejtësi dhe qeverisje të mirë.
Duke vlerësuar lart marrëdhëniet ndërmjet Kosovës dhe Mbretërisë së Bashkuar, Emisari Peach shprehu gatishmërinë për të thelluar bashkëpunimin, veçanërisht në fushën e sundimit të ligjit dhe të sigurisë.
Marrë për bazë përvojën e gjatë në rajonin e Ballkanit Perëndimor, emisari Peach shprehu vullnetin e tij për të ndihmuar në procesin e dialogut.
“U bisedua lidhur me ndikimin e aktorëve të tretë, e në veçanti ndikimin rus në rajon dhe pasojat e mundshme të kësaj ndërhyrje përmes shpërndarjes së informatave të rrejshme”, thuhet në komunikatën e Qeverisë.
Kryeministri Kurti dhe emisari Peach u dakorduan për intensifikim të përpjekjeve me qëllim të ruajtjes së stabilitetit dhe integritetit të vendeve të Ballkanit Perëndimor.
