Dita e djeshme ka qenë e shoqëruar me mijëra reagime në lidhje me dhunimin e një 11 vjeçare nga pesë burra.
Reagimet lidhur me këtë ngjarje po vazhdojnë edhe gjatë ditës së sotme.
Është gazetari Adriatik Kelmendi ai i cili përmes një shkrimi në Facebook ka thënë që ky sulm është një ngjarje që të lë pa fjalë.
Sipas tij, ne alarmohemi si shoqëri kur e keqja na përplaset turinjve, përcjell “Bota sot”.
“Po kërkohet të publikohen emrat e dhunuesve. Kërkesë shumë e drejtë. Por ne këtu, në rrjete sociale, i kemi dhunuesit që na paradojnë çdo të lumen ditë, me emër, mbiemër dhe figurë. Shikojini edhe një herë komentet e bishave nën lajmet që flasin për vajza, çifte, dhunë në çifte, ose nëna vetëushqyese, dhe do të bindemi se sa dhunuesi, sa mendja e sëmurë, nuk e ka fare problem të bëjë vepra penale çdo ditë pa u fshehur fare”, shkruan tutje Kelmendi.
Postimi i plotë
Sulmi i pesë bishave ndaj një vocërrakeje 11-vjeçare është nga ato ngjarje që të lënë pa fjalë. Memec. Se e sheh sa të pafuqishëm mund të jemi si individë përballë bishave në mesin tonë.
Pse nuk kam fjalë është se nuk jam i befasuar. Dhe ky është lajm edhe më i keq.
Ne alarmohemi si shoqëri kur e keqja na përplaset turinjve, kurse nuk e shohim çdo ditë tek na vallëzon ngadhënjyese para syve.
Po kërkohet të publikohen emrat e dhunuesve. Kërkesë shumë e drejtë. Por ne këtu, në rrjete sociale, i kemi dhunuesit që na paradojnë çdo të lumen ditë, me emër, mbiemër dhe figurë. Shikojini edhe një herë komentet e bishave nën lajmet që flasin për vajza, çifte, dhunë në çifte, ose nëna vetëushqyese, dhe do të bindemi se sa dhunuesi, sa mendja e sëmurë, nuk e ka fare problem të bëjë vepra penale çdo ditë pa u fshehur fare.
Ne si shoqëri i tolerojmë. Nganjëherë dikush edhe i shpërblen me ndonjë like “s’e ka keq”.
Pastaj të tillët trimërohen. Nga tastierat dalin në park, i shkojnë pas ndonjëherë edhe në shtëpi, në gjah ndaj viktimës që zbret nga ekranet e kompjuterëve dhe kthehet në viktimë edhe fizike.
Sa herë i kemi denoncuar të tillët? Sa herë i kemi lajmëruar në polici?
E keqja nuk na erdhi dje nga qielli. Vocërraken 11-vjeçare e kthyem në viktimë të gjithë ne, kush më shumë e kush më pak. E tmerri rritet kur e di thuajse qind për qind se nesër do të ketë edhe një viktimë tjetër, pastaj edhe një dhe pas asaj edhe të tjera…
Se kemi dështuar dhe po vazhdojmë të dështojmë!
