Dialogu mes Kosovës e Serbisë, ka kohë që zyrtarisht udhëhiqet nga Bashkimi Evropian me mbështetjen e Shteteve të Bashkuara të Amerikës.
Por, së fundmi, një angazhim më të madh kanë treguar Franca dhe Gjermania, me emërimin e emisarëve special për bisedimet, Jens Plötner (Jens Plytner) dhe Emmanuel Bonne (Imanuel Bon).
Të mërkurën në Beograd, presidenti turk Rexhep Taip Erdogan, tha se Turqia është e gatshme të ofrojë mbështetjen për tejkalimin e problemeve të hapura mes dy vendeve.
Për këtë gatishmëri të presidentit Erdogan, kryeministri i vendit Albin Kurti tha se ndihma e vendeve mike është e mirëseardhur.
“Turqia është shtet shumë i fuqishëm në NATO, por dialogu që zhvillohet ndërmjet Kosovës dhe Serbisë – ku Kosova nuk është aty temë por palë – bëhet me ndërmjetësimin e Brukselit dhe ndihmohet nga Shtetet e Bashkuara të Amerikës. Nesër do të vijnë përfaqësuesit specialë nga Berlini dhe Parisi që do ta shoqërojnë ndërmjetësin Lajçak, por natyrisht që ndihma e të gjitha shteteve tona mike është e mirëseardhur”, ka thënë Kurti.
Politologu Dorajet Imeri thotë se deklarata e presidentit turk, vjen pas vendimit të disa vendeve të Bashkimit Evropian, për shtimin e angazhimit në kuadër të dialogut.
Tani e tutje pritet të ketë një intensitet më të lartë të bisedimeve në Bruksel, kjo edhe për faktin se liderët janë pajtuar që të takohen çdo muaj.
