Ish-ministri i Shëndetësisë, Uran Ismaili, ka thënë se është për keqardhje dhe shqetësues mosbesimi i koalicionit qeverisës ndaj Institucioneve Publike Shëndetësore, duke përmendur operimin e presidentes Osmani në një klinikë private.
Ismaili thekson se tash bëhen një muaj prej kur Ministria e Shëndetësisë është pa ministër, teksa shton se shëndetësia nuk rregullohet me konferenca e vizita.
Reagimi i tij i plotë:
Qindra dhe mijëra qytetarë të Kosovës marrin shërbime shëndetësore çdo ditë në institucionet publike. Rrjedhimisht, fuqizimi dhe mbështetja e tyre duhet të jetë prioritet për secilin zyrtar dhe secilën qeverisje të vendit.
Sot, është për keqardhje mosbesimi i madh që ky koalicion qeverisës po tregon ndaj Institucioneve Publike Shëndetësore, siç është rasti i operimit të Presidentes në një klinikë private.
Për më tepër, neglizhenca ndaj sektorit të shëndetësisë prej kësaj Qeverie, është edhe më shqetësues.
Brenda pak muajve po e presim ministrin e tretë të Shëndetësisë, ndërkaq, po bëhen tashmë një muaj që kur ky sektor është PA ministër.
Shëndetësia nuk ndreqet me konferenca për media e as me vizita në shërbim të PR-it personal, por vetëm me investime konkrete, të cilat, fatkeqësisht, ende nuk po i shohim askund.
Shërim të shpejtë, Presidente!