Analisti Dukagjin Gorani ka thënë se përmbajtja e proceseve ndërmjet Kosovës dhe Serbisë si dhe marrëveshjes potenciale, nuk ka ndryshuar as me këtë qeveri, përkundër ndryshimeve në gjeopolitikën ndërkombëtare.
Ai, ka thënë se Asociacioni i komunave me shumicë serbe do të bëhet.
“Zajednicë ke me pasë, atë s’e vë kush në dyshim, mirëpo çfarë lloj kompetencash… p.sh a do të shtrihet edhe në jug, a do të jetë koncept territorial apo ligjor”.
Në këtë proces, ka thënë Gorani, është me rëndësi të dihet se në cfarë faze të procesit vijnë benefitet e synuara nga palët.
“Me rëndësi do të jetë qikjo, a vijnë këto privilegjet, ose këto karamelet, lehtësimet në kuptimin e heqjes së vizave, a vijnë para, gjatë apo pas procesit. Çështja e njohjes dhe mosnjohjes nga Serbia, çfarë fitojmë e çfarë humbin nga mosnjohja. Nëse për shembull krejt ky proces që përfshin Këshillin e Evropës, liberalizimin e vizave e këto… punë e madhe që s’na njeh Serbia edhe 100 vjet. Mirëpo, kjo s’ka qenë problem as 10-15 vjetësh”, ka deklaruar tutje ai.
Gorani ka vërejtur se janë dy situata që po zhvillohen në drejtime të kundër ndërmjet Kosovës dhe Serbisë.
“Nëse e shikon formalisht, drafti franko-gjerman dhe njëfarë konstruktiviteti i palëve po vërehet. Nëse shkon sonte në veri të Kosovës dhe e sheh situatën në terre, pas këtij problemi me targa, ti e sheh që situata është kah zhvillohet në drejtime të kundërta. Në rrafshin teorik-politik gjithçka po shkon si duhet, në anën tjetër je në situatë ku qeveria e Kosovës kurrë s’ka pasur nivel më të ulët komunikimi me serbët e Kosovës”, ka thënë Gorani.
