Ish-emisari i ShBA-së për dialogun Kosovë-Serbi, Richard Grenell, është shprehur se në Beograd të Serbisë, qytetarët atje janë gëzuar për fitoren e Shteteve të Bashkuara të Amerikës ndaj Iranit, në kuadër të Kampionatit Botëror që po mbahet në Katar, e cila ia siguroi kualifikimin tutje amerikanëve.
Madje sipas tij, i gjithë restoranti ku gjendej ai, festoi për rezultatin e futbollistëve amerikanë.
“I gjithë restoranti në Beograd po feston për golin e Amerikës”, shkroi Grenell në Twitter.
Cicërimës së Grenellit i ka reaguar ish-kryetari i Prishtinës, Shpend Ahmeti.
“Duke ditur kontratën e lobimit me Vuçiqin, e gjithë kjo duhet marrë me pak kripë”, i tha Ahmeti atij.
Por, e shpejt qe përgjigjja e ish-ambasadorit amerikan në Berlin. Ai e akuzoi Ahmetin për lajme të rreme.
“Askush nuk është i befasuar që ju nxitni lajme të rreme. Je kush je. Të gjithë e dinë që ju shpikni gjëra. Askush nuk mund ta besojë një fjalë që thua…”, shtoi Grenell.
