Deputeti i Partisë Demokratike të Kosovës, Hisen Berisha ka folur rreth dyshimeve të atentatit ndaj kreut të LDK-së, Lumir Abdxhikut dhe tre deputetëve të tjerë të kësaj partie.
Berisha ka thënë se ky atentat është i ngjashëm me atë që “Syri i Popullit” kishte planifikuar më parë dhe ky është një fakt shqetësues.
“Është shqetësuese kur ka lajme të tilla, aq më tepër kur vijnë nga shtete e institucione kredibile që kanë kapacitete me hulumtu e me zbulu diçka të tillë. Mendoj se kjo do t’i vë në veprim mekanizmat tona, Kosova është e mbuluar nga struktura hetimore qoftë të inteligjencës, qoftë si hetues policor, prokuror etj. Pastaj burim informacioni janë organet inteligjencës gjermane dhe këto e kanë lehtësuar situatën që të merret vesh e vërteta e këtij lajmi. Për të mundur me fol diçka më shumë duhet ditur motivet, këto janë figura publike që bartin përgjegjësi. Abdixhiku është lider i një subjekti dhe tendenca për të kërcënuar jetën e tij për shkaqe tradhtie po më duket shumë e ngjashme me atë të “Syrit të Popullit”, pra tepër banale dhe shqetësuese, sepse nëse dikush dyshon për tradhti e krim ekzistojnë organet kompetente….”, ka thënë Berisha.
Sipas mediave ishin organet e inteligjencës gjermane kanë zbuluar një atentat të planifikuar ndaj kreut të LDK-së dhe tre deputetëve të kësaj partie.
