Profesori i së Drejtës Kushtetuese, Arsim Bajrami ka thënë se propozimi evropian për normalizim të marrëdhënieve mes Kosovës dhe Serbisë nuk është marrëveshje ideale, por sipas tij, është marrëveshje dy hapa përpara.
“Kosova në këtë rast pa dyshim se duhet ta kuptojë se kjo marrëveshje është larg ideales por për mendimin tim është dy hapa përpara, nuk është prapa, por është dy hapa përpara drejt përmbylljes së plotë të procesit të shtetndërtimit. Për shkak se edhe pse Kosova është e pavarur, edhe pse është shtet, procesi i shtetndërtimit është i bllokuar me faktin se Kosova nuk është subjekt i së drejtës ndërkombëtare”, tha Bajrami.
Ai pret që kjo marrëveshje të jetë e tipit të “shkopit dhe karrotës” që palët të cilat e pranojnë të shpërblehen dhe ato që e refuzojnë të ndëshkohen
“27 shtete para dy dite kanë përkrahur në mënyrë unanime planin, Shtetet e Bashkuara të Amerikës e kanë përkrahur planin dhe unë nuk shoh shumë hapësirë për ndryshime apo plotësime, për shkak se si duket do të përdoret metoda e Dejtonit ku palëve që janë shumë larg njëra-tjetrës, palëve që asnjëherë nuk do të mirreshin vesh, t’ju imponohet një marrëveshje e balancuar e cila imponon një paketë stimulative por edhe sanksione të caktuara për të dy palët”, ka shtuar Bajrami në Tëvë 1.
Bajrami e ka quajtur kërkesë legjitime idenë që njohja nga 5 shtetet mosnjohëse të përfshihet në propozimin evropian dhe për këtë të kërkohen garancione
“Njohja e shteteve bëhet në dy mënyra: kolektive kur një shtet bëhet anëtar p.sh i OKB-së, atëherë merr një njohje universale dhe njohje individuale, shtet për shtet. Kërkesa e Kosovës që të marr garancione të fuqishme politike dhe legale që në rast të nënshkrimit të marrëveshjes do të pasojë njohja nga 5 shtetet, është kërkesë legjitime dhe më e paktë që Kosova mund të bëjë”, ka shtuar Bajrami.
Sipas tij, më problematike do të jetë njohja nga Greqia e Qipro.
“Unë jam optimist që tri shtete mund të lëvizin po jam skeptik sa i përket Spanjës dhe Qipros të cilat kanë probleme të brendshme dhe nuk e kanë fort të lehtë këtë çështje dhe duhet një presion i madh i BE-së që ato të lëvizin”, ka thënë tutje ai.
