Kryeministri i Kosovës, Albin Kurti, e ka cilësuar propozimin franko-gjerman si bazë të mirë për bisedime të mëtutjeshme me Serbinë.
Si të tillë e sheh edhe profesori nga University College London, Eric Gordy.
Megjithatë ai thotë se ky plan nuk ofron një zgjidhje afatgjate mes Kosovës dhe Serbisë.
“Propozimi franko-gjerman duket si bazë e mirë për të vazhduar dialogu mes Kosovës dhe Serbisë. Kjo i ngjason marrëveshjes mes Gjermanisë Lindore dhe Perëndimore gjatë luftës së ftohtë, ku palët nuk adresojnë direkt çështjen e njohjes së ndërsjellë, por as nuk e pengojnë njëra-tjetrën. Pra, propozimi është bazë e mirë, por nuk ofron zgjidhje afatgjate”, u shpreh ai.
Gordy i sheh të lënduara raportet mes Kosovës dhe Shteteve të Bashkuara të Amerikës.
Sipas tij, Kryeministri Kurti nuk gëzon popullaritet ne sytë e miqve ndërkombëtar.
“Duhet pranuar një gjë se me ardhjen e Kurtit në krye të lidershipit në Kosovë disa gjëra kanë ndryshuar në raport me Shtetet e Bashkuara të Amerikës dhe miqve tjerë ndërkombëtar. Ai është më pak i popullarizuar në sytë e miqve perëndimor për shkak të disa veprimeve të tij në të kaluarën. Prandaj, ai po ka vështirësi në raport me ta, krahasuar me ish-liderët e tjerë të Kosovës. Pra shoh lëndim të raporteve mes SHBA-së edhe Kosovës”, shtoi Gordy.
Profesori ka folur edhe për çështjen e themelimit të Asociacionit të Komunave me shumicë serbe.
Ai thotë se Serbia ka ambicie ta nxjerr maksimumin nga kjo marrëveshje me Kosovën.
“Natyrisht që ka presion mbi formimin e Asociacionit, sepse ka një marrëveshje për këtë. Po shoh se pala serbe po kërkon të nxjerrë maksimumin nga kjo marrëveshje me Kosovën. Nëse përmes asociacionit synohet të krijohet një forme autonomie sikurse në Bosnje, atëherë kjo është e rrezikshme. Por, unë nuk e shoh të arsyeshme që kjo të ndodhë. Pra duhet një kompromis nga të dyja palët për të ecur para”, tha ai.
Kryeministri i Kosovës, Albin Kurti është dakorduar në parim me planin franko-gjerman ndërsa Presidentit i Serbisë, Aleksandar Vuçiq ka qenë më i luhatshëm në raport me këtë propozim.
