Sot ka dështuar seanca gjyqësore ndaj kryetarit të Kuvendit, Glauk Konjufca.
Kjo për shkak të mungesës së dëshmitarëve Adem Grabovci, Ismet Beqiri e Slobodan Petroviq, të cilët kanë qenë deputet kur ka ndodhur rasti, raporton Betimi për Drejtësi.
Gjyqtarja e rastit Edita Çanta ka lëshuar urdhër që Grabovci dhe Beqiri të sillen me detyrim për të dhënë dëshmi.
Pas këtij urdhri ka reaguar avokati Besnik Berisha.
Në profilin e tij në “Facebook”, ai ka shkruar se tani ish-deputetët Grabovci dhe Beqiri mund të sillen zhag në gjykatë.
“Adem Grabovcin e Ismet Beqirin mundeni edhe zhag me i cu në gjykatë, po se di a po e zbatoni standardin e njëjtë edhe për pushtetarët?! Akoma ka aktakuza në sirtar që rendojnë mbi pushtetarë, por për cudi prezenca e tyre nuk sigurohet me detyrim, anipse ata e kanë obligim të paraqiten së paku njëherë në gjykim. Tek ne, drejtësi e barazi para ligjit ka vetëm në ligj e kushtetutë!”, ka shkruar Berisha.
