Ish-deputetit të Kosovës Andin Hoti i është sekuestruar një pronë, kjo pasi Prokuroria Themelore e Pejës ka urdhëruar ngrirjen e mbi 80 parcelave në Pejë, Gjakovë, Deçan, Klinë dhe Istog. Apeli e ka vërtetuar fajësinë e Agron Kelmendit për uzurpim të pronave.
Kelmendi pronar i një kompanie të patundshmërive në Pejë, kishte bërë dhurata të pazakonta vite më parë. As më shumë e as më pak, ai u kishte falur parcela toke në pesë komuna të rajonit të Dukagjinit
Në mesin e këtyre parcelave ka të tilla që iu kanë falur personave të njohur si ish-kryetarëve të komunave, ish-gjyqtarëve, zyrtarëve policorë e artistëve.
Një nga personat që i është sekuestruar prona është edhe ish-deputeti i PDK-së, Andin Hoti.
Ai i ka pranuar 3.5 ari tokë në Istog duke i deklaruar si dhuratë në vlerë prej 20 mijë euro.
Hoti tha se toka i është falur duke dashur ta ndihmojnë familjen e Ukshin Hoti.
“Në vitin 2014 më është falur toka në sipërfaqe 3.5 ari në Istog, dhe arsyeja e faljes së tokes ka qenë: Dua t’i ndihmoj familjes së Ukshin Hoti. Me sa më është thënë mua, ajo pronë është blerë nga serbët dhe pronari ka dashur ta dhurojë tek disa familje kontribut-dhënëse”, tha Hoti.
Në prezencën e këtyre rrethanave Prokuroria Themelore në Pejë ka iniciuar hetimin për konfiskimin e pasurisë konform Ligjit për kompetencat e zgjeruara për konfiskimin e pasurisë.
Prokuroria e Pejës pretendon se të ardhurat e biznesmenit nuk e arsyetojnë këtë pasuri sepse siç thuhet në kërkesën për “Lëshimin e Urdhrit Kufizues Përfundimtar”, të cilën e ka siguruar Express, nga të dhënat e ATK-së, “i pandehuri për bizneset “Agron Kelmendi” BI, me emrin tregtar të biznesit A.P “Kontakti”, për periudhën kohore 2005-2019 ka deklaruar 00 qarkullim”.
“Për të gjitha këto pasuri, duke vlerësuar gjasat, provohet se të hyrat legjitime të të pandehurit nuk mjaftojnë për blerjen dhe posedimin e tyre, për faktin se i njëjti ka të hyra të deklaruara 00 por posedon pasuri tejet të madhe”, ka deklaruar prokuroria.
