“Kriminelët e vërtetë janë në Serbi, ata duhet të gjykohen dhe Gjykatë Speciale është dashur të ketë Serbia dhe jo Kosova”, tha kryetari i komunës së Rahovecit, Smajl Latifi.
Nënkryetari i Aleancës për Ardhmërinë e Kosovës (AAK) mori pjesë në marshin në shenjë solidarizimi dhe mbështetjeje për ish-krerët e UÇK-së, Hashim Thaçi, Kadri Veseli, Jakup Krasniqi e Rexhep Selimi, që po mbahen në Hagë.
Latifi tha se për krimet e shumta që janë kryer në Kosovë ndaj shqiptarëve duhet të hetohen e të gjykohen serbët që kanë dhënë urdhër dhe ata që io kanë ekzekutuar.
Latifi: Kriminelet e vërtetë janë në Serbi
“Është një masë e madhe që e ka përqafuar idenë e solidarizimit dhe marshimit për drejtësi. Është dëshmi që Ushtria Çlirimtare e Kosovës ka lindur nga populli, pra rrënjët i ka në popull dhe është një solidaritet, për shkak se dihet që Gjykata Speciale, përkatësisht Dhomat e Specializuara, nuk kanë aspak të drejtë me qasjen e tyre ndaj Kosovës, duke i gjykuar ushtarët e UÇK-së. Kriminelët e vërtetë janë në Serbi dhe ata duhet të hetohen, të gjykohen dhe të ndëshkohen për krimet e shumta dhe gjenocidet që i kanë bërë ndaj shqiptarëve. Gjykatë Speciale është dashur të ketë Serbia dhe jo Kosova”, tha ai.
Latifi shtoi se Ushtria Çlirimtare e Kosovës është emblemë e lirisë dhe vlera sublime që kombi shqiptar ka krijuar
Latifi: UÇK-ja është emblema dhe vlera sublime që kombi shqiptar e ka
“Edhe ata të cilët nuk kanë mundur të jenë pjesë e këtij aktiviteti, këtij marshimi, besoj se e ndjejnë që Ushtria Çlirimtare e Kosovës, është emblema e lirisë dhe është vlera më sublime që ka krijuar kombi shqiptar, sidomos pjesa e kombit shqiptar që ka qenë e pushtuar, e shtypur, e shfrytëzuar nga pushtuesi sllav”, shtoi ai.
Kujtojmë se nesër (3 prill), do të fillojë procesi gjyqësor ndaj ish-krerëve të UÇK-së, të cilët po mbahen në Hagë, që nga nëntori i vitit të kaluar.