Janë liruar katër qytetarët e Kosovës të cilët ishin arrestuar të martën nga autoritetet serbe në Merdare. Njëri prej tyre ka deklaruar se nga policia serbe u është thënë se ndalimi i tyre ka ndodhur për shkak të çështjeve politike që lidhen me situatën në veri të vendit.
Dervish Maliqi ka thënë para gazetarëve se nga kufiri ishin marrë nga dy civilë dhe pastaj janë dërguar në Kurshumli.
Maliqi: Policia në Kurshumli na ka thënë se arrestimi ynë është politik
“Përpos këtyre dy civilëve që na kanë marrë këtu jo mirë, tjerët policë si në Kurshumli si në Prokuple na kanë trajtuar shumë mirë për shkak se edhe çuditeshin për këtë rast, dhe secili polic thoshte kjo është vetëm politikë. Akuza ka qenë, janë disa baraka këtu 200 metra më poshtë, kinse ato janë dëmtuar dhe të dyshuar kemi qenë ne, ne dy dhe dy shoferë të tjerë të kamionëve. Ata çka munden me bë është 48 orë mbajtje si i dyshuar, më shumë nuk patën fakte. Sipas Policisë, nuk ka pas të bëjë me baraka, kjo është vetëm politikë, për shkak të tensioneve në veri”, ka thënë ai.
Ndërsa Esat Musolli ka treguar si ka ndodhur ngjarja të martën.
Musolli: Jemi nisur për Gjermani, na kanë ndaluar në kufi në Merdare
“Ne kemi qenë duke shkuar për Gjermani dhe këtu në kufi te ne kaluam mirë, andej si kemi dalë na kanë ndaluar, na i morën dokumentet dhe mandej nuk kemi ditë asgjë veç kanë thonë parko xhipin andej dhe na kanë marrë na kanë shti në një xhip dhe na kanë çuar në Kurshumli. Aty kemi ndejt 2 orë, nuk kemi ditë asgjë njëherë, tani gjëja se e kemi bërë njëfarë dëmi këtu në vitin 2022 me 02.03, kemi bërë njëfarë dëmi këtu të kontejnerëve dhe për shkak të atyre jemi të akuzuar”, ka thënë ai.
Pas kësaj, Maliqi u ka bërë thirrje mërgimtarëve që mos të shfrytëzojnë rrugën për Serbi për të shkuar në Europë.
Maliqi: Mërgimtarët të shfrytëzojnë rrugët nga Mali i Zi dhe Kroacia
“Asgjë nuk na kanë thënë 3 orë deri në stacionin policor në Kurshumli. Civilët na kanë dorëzuar në stacion policor. Janë liruar edhe dy të tjerët...Do të vazhdojmë (për në Europë) ndoshta por nga rruga Mali i Zi - Kroaci, nuk kisha preferua njëherë me kalu këtë rrugë edhe mërgimtarët, sepse u akuzojnë pa bazë, çka munden me bë janë këto maltretimet dy ditore...Familjarët i kemi lajmëruar tinza derisa na i kanë marrë telefonat”, ka thënë ai.
Aktualisht Serbia po i mban edhe tre policë të Kosovës të cilët i ka rrëmbyer të mërkurën.
PK ka deklaruar se tre zyrtarët kufitarë janë rrëmbyer nga forcat serbe gjatë një patrullimi në vijën kufitare në veri të Kosovës derisa kanë qenë në detyrë, thellë brenda territorit të Kosovës, për të parandaluar shfrytëzimin e rrugëve ilegale.
