Gjykimi kundër Thaçit dhe të tjerëve vazhdon në sesion privat

Në Dhomat e Specializuara në Hagë po vazhdon dëgjimi i dëshmitarit të 11-të në gjykimin ndaj ish-krerëve të Ushtrisë Çlirimtare të Kosovës (UÇK). Hashim Thaçi, Kadri Veseli dhe Rexhep Selimi janë në sallën e gjyqit ndërsa Jakup Krasniqi po e ndjek këtë proces përmes video-lidhjes.

Edhe në këtë rast po aplikohen masa mbrojtëse duke mos e shfaqur në publik identitetin e dëshmitarit, teksa në seancë të mbyllur po vazhdojnë pyetjet nga ZPS-ja.

Dëshmitari që mban numrin 03811, po vazhdon dëshminë e tij duke u përgjigjur në pyetjet e prokurorit special, James Pace. Me fillimin e pyetjeve, seanca ka vijuar në sesion privat.

Në fillim të seancës, kryegjykatësi Charles Smith tha se ekipet e mbrojtjes kanë shkurtuar kohën për të marrë në pyetje këtë dëshmitar.

Smith: Parashikojmë që dëshminë tuaj ta përfundojmë sot përpara drekës

“Ekipet e mbrojtjes e kanë shkurtuar kohën për t’ju marrë në pyetje, në më pak se sa dy orë. Kështu që ne parashikojmë që dëshminë tuaj ta përfundojmë sot përpara drekës. Ju kujtoj që ju lutem mundoheni që të jepni përgjigje të qarta pyetjeve, me fjali të thjeshta”, theksoi ai.

Po ashtu, ai bëri të ditur se dokumenti i diskutuar ditën e djeshme do të pranohet si provë materiale.

Pas pushimit, Smith tha se do të kërkojë të dijë për kohën që nevojitet për kundër-pyetjet.

Gjykimi ndaj ish-krerëve të UÇK-së ka nisur më 3 prill me deklaratat hyrëse të palëve.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës.

Ata ndodhen në qendrën e paraburgimit në Hagës prej nëntorit të vitit 2020.

Menjëherë pasi dëshmitari i dhjetë i Zyrës së Prokurorit të Specializuar (ZPS) e përfundoi dëshminë pasditen e së hënës, filloi të dëgjohet dëshmitari i radhës në rastin kundër Thaçit dhe të tjerëve. Edhe në këtë rast po aplikohen masa mbrojtëse duke mos e shfaqur në publik identitetin e tij.

Pyetjet e para të prokurorit James Pace vijuan në seancë private, meqë siç tha ai, kanë të bëjnë me identitetin e dëshmitarit. Ai prezantoi disa dokumente në ekranin e gjykatores, por të njëjtat nuk janë bërë publike.

Dëshmitarit iu shfaq edhe deklarata që e kishte dhënë për UNMIK-un në vitin 2003 si dhe ajo e për ZPS-në në vitin 2022. Ai konfirmoi nënshkrimet e tij në këto dokumente derisa tha se është i hapur të përgjigjet për ngjarjet e vitit 1998-1999.

Pas kësaj seanca përfundoi për të vazhduar sot (e martë) me dëshminë e këtij dëshmitari i cili mban kodin 3811. Dëshmia e tij pritet të dëgjohet për një ditë e gjysmë.

Paraprakisht është dëgjuar dëshmitari 3540 i cili ka folur për periudhën e vitit 1998 kur edhe pretendon se ishe ndaluar nga UÇK. Ai ka thënë se ka punuar roje pylli kur sipas tij ishte ndaluar nga ushtarë të UÇK-së.

Fillimisht ai nuk ka thënë se ka dhënë informata për UÇK-në te autoritetet serbe por më pas mbrojtja e Thaçit, Gregory Kehoe e ka përballur atë me deklaratën që vetë e kishte dhënë për ZPS-në, ku thuhej se kishte informuar Serbinë për aktivitetet e UÇK-së.

Dëshmia ka përfunduar brenda ditës dhe është dhënë kryesisht në seancë të hapur për publikun, por me masa mbrojtëse duke mos shfaqur identitetin e tij.

Pas përfundimit të dëshmisë së tij, kryegjykatësi Charles Smith ka urdhëruar ZPS-në që t’i jap trupit gjykues, palëve dhe pjesëmarrësve, listën e 12 dëshmitarëve nga lista e 40 prej tyre dhe ta dorëzojë këtë deri të premten, 30 qershor 2023 në orën 16:00

Ai ka thënë se ZPS duhet gjithashtu të jap një listë të pesë dëshmitarëve që do të jenë në pritje përveç 12 dëshmitarëve të parashikuar.

Gjykimi ndaj ish-krerëve të UÇK-së ka nisur më 3 prill me deklaratat hyrëse të palëve.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës. Ata ndodhen në qendrën e paraburgimit në Hagë prej nëntorit të vitit 2020.