Kryeministri i vendit, Albin Kurti ka reaguar pas sulmit të mbrëmshëm me granatë dore në ndërtesën e komunës së Mitrovicës së Veriut.
Kurti në Twitter tha se fatmirësisht nga ky sulm nuk u lëndua askush.
Teksa i ka bërë thirrje Serbisë që të ndërpresë nxitjet për dhunë para se siç tha ai, të humbasin jetë.
“Mbrëmë ndërtesa e komunës në Mitrovicë është sulmuar nga 2 granata dore, duke shkaktuar dëme në veturat e afërta. Fatmirësisht asnjë person nuk u lëndua, por mund të kishte ndodhur lehtësisht. I bëj thirrje Serbisë që menjëherë të ndërpresë nxitjet për dhunë para se të humbasin jetë”, ka shkruar Kurti.
Ndryshe, në orët e vona të mbrëmjes të së hënës, persona të dyshuar kanë sulmuar me mjet shpërthyes komunën në Mitrovicë të Veriut.
Drejtori i Zyrës për Informim në Policinë e Kosovës, Baki Kelani bën të ditur se dyshohet se mjeti shpërthyes ka qenë granatë dore.
Sipas Kelanit, lëndime në njerëz nuk ka, teksa dëme materiale janë shkaktuar në dy vetura.
