Deputeti i Partisë Demokratike të Kosovës, Hisen Berisha thotë se përleshja mes disa deputetëve të kësaj partie me anëtarët e kabientit qeveritar sot në Kuvend, nuk është e hijshme. Por, siç vlerëson ai, gjuajtja me ujë nuk është e rrezikshme.
Berisha tha se gjuha e kryeministrit Albin Kurti sot ishte e padurueshme.
“Hiq nuk është mirë me ndodh këso, as gjuajtje me ujë, mirëpo gjuajtja me ujë nuk është një diçka e rrezikshme, diçka lënduese. Është thjesht një demonstrim,një performim, për ta penguar në një mashtrim, në një gënjeshtër që ai po bënte…sot ishte e padurueshme mënyra se si fliste me gjuhë mashtruese, me një gjuhë krejt jashtë realitetit kryeministri në foltore”, deklaroi ai.
Ai shtoi se zëvendëskryeministri Besnik Bislimi është përzierë në veprimet e deputetëve.
“Çka deshi të demonstrojë ai”, pyet Berisha.
“Dhe ai zëvendësi i tij, ai kryenegociatori i të gjitha vendeve të dëmshme për këtë vend…del dhe heq një letër, deshi të demonstrojë ai. Ai po përzihet në veprimet e deputetëve, aty mund të kishte dalë një deputet cilido i Vetëvendosjes me heq, është lojë mes deputetëve, por jo ai, as ai, as ajo Haxhiu atje…derisa ky gjuajti me ujë, ai gjuajti me shishe”, potencoi deputeti Berisha.
