Jeton Rexhepi, drejtor i Divizionit të Komunikacionit Rrugor në Policinë e Kosovës, ka bërë të ditur se këtë vit kanë vdekur 54 persona si pasojë e aksidenteve të trafikut.
Ai tha se në periudhën e njëjtë në vitin e kaluar kishin humbur jetën 59 persona.
“Shkaktar më të shpejtë janë tejkalimi i shpejtësisë, tejkalimi në vende të ndaluar, mosrespektimi i sinjalizimit. Mosmbajtja e distancës së sigurisë, një shpërqendrim sidomos me telefon, shkaktohet aksident me dëme apo lëndime… Deri sot 54 persona kanë humbur jetën, vitin e kaluar kanën qenë 59”, tha ai.
Rexhepi po ashtu bëri të ditur se në këtë sezon të verës ka tendencë të rritjes së aksidenteve të trafikut krahasuar me vitin e kaluar.
“Tani në këtë fillim të sezonit veror, numri i aksidenteve me dëme e lëndime ka tendencë të rritjes krahasuar me vitin paraprak. Por, nëse i referohemi të dhënave për periudhën e vitit në krahasim me periudhën e njëjtë të vitit të kaluar, numri i aksidenteve me fatalitet ka shënuar rënie”, tha ai.
Ai tha se me ardhjen e bashkatdhetarëve në Kosovë ngarkohet edhe trafiku. Sipas tij janë mbi 430 mijë automjete aktive në Kosovë, kurse nga diaspora vijnë gati sa gjysma e këtij numri.
