Ambasadori i Gjermanisë në Kosovë, Jorn Rohde, ka thënë se është e qartë se zgjerimi i BE’së është top prioritet i politikës së jashtme dhe se ka konsensus në nivel të BE’së.
Këtë deklaratë, Rohde e ka dhënë nga Berlini ku po merr pjesë në konferencën e ambasadorëve gjermanë që shërbejnë jashtë shtetit.
“Pas pjesëmarrjes në dy panele depërtuese mbi zgjerimin e BE-së sot, konkluzioni im kryesor është kristal i qartë: Zgjerimi i BE-së nuk është vetëm prioriteti ynë kryesor në Politikën e Jashtme, por edhe një konsensus në nivel të BE-së që nënvizon rëndësinë e tij të pamohueshme si një domosdoshmëri gjeopolitike” ka shkruar Rohde, në platformën X, pas pjesëmarrjes në mbledhjen e më shumë se 220 shefave të misioneve gjermane të akredituara nëpër botë, ku edhe Ministrja e Jashtme e Gjermanisë Analena Baerbock ka mbajtur fjalim.
Çështja e zgjerimit të Bashkimit Europian u rikthye në agjendë javën që shkoi kur Presidenti i Këshillit të BE’së Charles Michel në Slloveni theksoi se BE dhe Ballkani Perëndimor duhet të jenë të gatshme për zgjerim në vitin 2030.
