Presidentja e Kosovës, Vjosa Osmani, po qëndron në një vizitë zyrtare dyditore në Shqipëri.
Pas takimeve me krerët e shtetit gjatë ditës së djeshme, Osmani sot ka vizituar qytetet e Shqipërisë – Beratin, e tashmë gjendet në Durrës.
Gazetari Flamur Gajtani njofton se në këto momente është duke u zhvilluar një takim mes Osmani dhe kryetares së Bashkisë së Durrësit, Emirjana Sako.
“Aktualisht jemi në ndërtesën e Bashkisë së Durrësit, të cilën po e viziton Vjosa Osmani, dhe është pika e parafundit e vizitës së saj dyditore në Shqipëri. Ajo po e zhvillon një takim me Emirjana Sako, kryetaren e Bashkisë së Durrësit. Pas këtij takimi, Osmani me delegacion do të zhvillojë një vizitë në pikën doganore të Kosovës në Portin e Durrësit”, ka thënë Gajtani.
Kujtojmë se Osmani gjatë ditës ka qëndruar në Berat, ku është pritur nga i pari i bashkisë, Ervin Demo, i cili edhe i ka ndarë Osmanit titullin “Patron i Kalasë”, që u jepet personaliteteve që japin kontribut në promovimin e Kalasë së Beratit.
I pari i Beratit tha se ky çmim nuk u jepet ndonjë vizitori të thjeshtë apo turisti, “por i jepet dikujt që ka promovuar qytetin e Beratit që është në mbrojtje të UNESCO-s, e që sipas tij Vjosa Osmani e ka bërë më së miri këtë”.
Edhe vet Osmani tha se ndihet e respektuar me nderin që i është bërë nga qyteti i Beratit. Ajo tha se “monumentet e tilla, si Kalaja e Beratit, janë krenari shtesë për popullin shqiptar kudo, dhe se promovimet e tilla do t’i bëjë në vazhdimësi”.