Qendra Kosovare për Rehabilitimin e të Mbijetuarve të Torturës (QKRMT) lanson projektin “Rehabilitimi dhe Riintegrimi i të Miturve – Viktima të Dhunës Seksuale”.
Ministrja e Drejtësisë, Albulena Haxhiu, me këtë rast ka thënë se kanë ndërmarrë një varg reformash ligjore që e adresojnë këtë çështje.
“Për gjatë këtyre dy viteve mandat kemi iniciuar dhe zbatuar një seri reformash ligjore e financiare të cilat adresojnë ngacmimet, por edhe dhunën seksuale dhe fuqizojnë politikat e parandalimit. Protokolli shtetëror për trajtimin e rasteve të dhunës seksuale që për herë të parë Republika e Kosovës e ka miratuar një dokument të tillë është një nga dokumentet më të rëndësishme që është hartuar në bashkëpunim me partnerët organizata përfshirë edhe organizatën KRTC që në fakt trajton formën e rëndë shkeljen e rëndë të të drejtave të njeriut që është edhe dhuna seksuale”, ka thënë Haxhiu.
Por sipas saj shqetësuese mbetet fakti i rritjes së vazhdueshme të numrit të rasteve. Ajo ka konfirmuar se nga janari janë ekzaminuar në Institutin e Mjekësisë Ligjore, 74 raste të dhunës seksuale.
“Për fat të keq të dhënat e fundit në Kosovë tregojnë për një rritje të rasteve te dhunës seksuale nëse marrim statistikat nga janari deri shtatori ne vitin 2023 janë 74 raste te ekzaminuar në Institutin e Mjekësisë Ligjore te dhënat gjithashtu tregojnë një numër ne rritje konsiderueshme te fëmijëve që janë të mbijetuar të kësaj forme dhunës krahasuar me numrin e të rriturve”, ka vijuar ajo.
Ky numër kaq i madh i rasteve e sidomos te të miturit, sipas ministres është kambanë alarmi për të gjitha institucionet që të bashkëpunojnë e të ndërmarrin masa.
“Rastet e dhunimit seksual te raportuar ndër vite janë kambanë e fuqishme alarmi për të gjitha institucionet tona për Ministrinë e Drejtësisë, Qeverinë për institucionet e drejtësisë, policinë për organizatat poashtu dhe prandaj duhet të bashkojmë të gjitha përpjekjet dhe një zëri të luftojmë kundër stereotipave gjinore”, ka përfunduar ai.
