Nënkryetarja e PDK-së, Vlora Çitaku, ka komentuar bastisjet e fundit të Prokurorisë së Gjykatës Speciale në shtëpitë e ish-këshilltarëve të Hashim Thaçit.
Çitaku ka thënë se Specialja ka degraduar në gjyqe të politizuara dhe gjueti shtrigash.
“Dhomat e Specializuara të Kosovës u krijua për të hetuar pretendimet për marrjen e organeve. Ajo tani ka degraduar në organizimin e gjyqeve të politizuara në Hagë dhe një gjueti shtrigash në shkallë të gjerë brenda Kosovës kundër gazetarëve, ish-këshilltarëve, kujtdo që ka ndonjë lidhje me UÇK-në. Një perversitet i drejtësisë”, ka shkruar Çitaku në X.
Gjatë ditës së hënë dhe martë me urdhër të ZPS-së janë bastisur shtëpitë e Blerim Shalës, Bashkim Smakës e Artan Behramit, të tre ish-këshilltarë të Thaçit.
