Kreu i Aleancës Kosova e Re, Behgjet Pacolli, ka folur sërish për “zërat” që, sipas tij, po “e duan njollosjen e emrit të tij”.
Ai ka treguar një bisedë me djalin e tij të vogël, të cilin e ka këshilluar që të mos ndikohet nga askush, përcjell Bota sot.
“Duke fluturuar mbi Evropë, djali im i vogël Armani (diku e kishte dëgjuar) më tha. “Babi ata që po flasin dhe duan të na njollosin emrin, a janë ata si endacakët që lehin derisa ne po fluturojmë mbi ta, ne po fluturojmë shumë lart mbi ta”.
Ai këtu e kishte fjalën për ata, të cilët po tentojnë të njollosin emrin e nderin e familjes tonë.
Unë u buzëqesha dhe i thashë, mos u ndikoni nga askush, vazhdoni të respektoni dhe bëhuni të mirë me të tjerët!”, ka shkruar Behgjet Pacolli në një postim në Facebook.
Reagimi i tij, vjen pas një sërë reagimesh të mëparshme, pasi emrin e ish-presidentit të Kosovës, e kanë ndërlidhur me vrasjen e Liridona Ademaj Murselit. Kjo e fundit, ishte mike e familjes Pacolli dhe bashkëshorte e Naim Murselit, ish-këshilltar i kreut të AKR-së.
Liridona u vra natën e 29 nëntorit, në një pritë të inskenuar si grabitje me armë në Sinidoll të Prishtinës. Për vrasjen e saj, janë arrestuar katër persona, ndër të cilët edhe bashkëshorti i saj, Naimi. Ky i fundit, sipas policisë dyshohet se ishte porositësi i vrasjes./Botasot
