Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës.
Shpesh herë pakënaqësitë e tyre kalojnë në kërcënime, duke ua vështirësuar kështu punën e madje duke ua kërcënuar edhe jetën.
Një rast i till rëndë ka ndodhur para dy netësh në Prizren, ku një person i cili është arrestuar pas një përleshjeje në të cilën ishte përfshirë, dyshohet se ka sulmuar fizikisht edhe zyrtarin policor që po intervenonte në rast.
Gazeta raporti ekskluzivisht se i dyshuari ishte Dibran Kastrati.
Ndaj të njëjtit Gjykata ka caktuar një muaj paraburgim.
Si ndodhi ngjarja?
E gjithë ngjarja dyshohet të ketë ndodhur pasi Kastrati është përfshirë në një përleshje tjetër, e që kishte aktivizuar Policinë që të dalin për intervenim në vendngjarjes.
Gjatë arrestimit, Kastrati dyshohet se ka goditur policin e ekipit intervenues dhe të njëjtit i ka shkaktuar lëndime të rënda trupore. Zyrtarët tjerë policorë kanë arritur që ta vënë nën kontroll të dyshuarin, i cili është shoqëruar në stacion.
Ndërsa zyrtari policor është dërguar në Emergjencën e Spitalit Rajonal në Prizren, ku sipas burimeve pas ekzaminimeve mjekësore është konstatuar se shkaku i goditjes ka pësuar frakturë në hundë.
I dyshuari pasi i është nënshtruar testit të alkoolit, ka rezultuar në gjendje të dehur dhe të njëjtit po ashtu i është ofruar edhe ndihmë mjekësore.
Pas përfundimit të procedurave policore, Prokurori i Shtetit ka nxjerrë aktvendim që 33-vjeçarit t’i caktohet masa e ndalimit policor dhe i njëjti do të hetohet nën dyshimet për kryerjen e veprës penale ‘Sulm ndaj personit zyrtar’.
