Në dokumentin e Bashkimit Evropian për njohjen e dokumenteve të udhëtimit të vendeve të treta, thuhet se Spanja e ka njohur pasaportën e Kosovës, por se kjo nuk do të thotë njohje e shtetësisë së Kosovës.
Paraprakisht, zëvendëskryeministri i Kosovës Besnik Bislimi bëri të ditur se Madridi ka njohur pasaportat e Kosovës.
Vendimi për njohjen e pasaportave të Kosovës është marrë më 1 janar.
“Nga 1 janari 2024, Spanja njeh pasaportat e lëshuara nga Kosova. Ky ndryshim në asnjë mënyrë nuk paraqet njohje zyrtare të Kosovës”, thuhet në dokument.
Spanja është ndër pesë vendet anëtare të Bashkimit Evropian që nuk e njohin Kosovën.
Ndërsa gazeta spanjolle “El Periodico” thotë se qeveria në Prishtinë ka festuar njohjen e pasaportave të Kosovës në Madrid në rrjetet sociale, dhe se Bislimi “e ka festuar si “lajm të mirë” atë “pengesë” për mosnjohjen e pasaportave zyrtare të Kosovës në kontrollet kufitare spanjolle.
Kjo, shkruan gazeta spanjolle, është “dikotomia paradoksale në të cilën hynë marrëdhënia mes Spanjës dhe Kosovës në fillim të vitit për shkak të hapjes së zonës Shengen për qytetarët e Kosovës, me vendim të BE-së”.
“Krahasoni elokuencën e shprehur këtë të shtunë në Prishtinë, me heshtjen që mbetet në Madrid. Ministria e Punëve të Jashtme të Spanjës nuk ka komentuar për këtë çështje, dhe burime nga ai departament – me në krye ministrin José Manuel Albares – tani për tani janë kufizuar për të mos refuzuar njohjen e dokumenteve të udhëtimit të Kosovës, por vini re se Spanja është ende një nga pesë vendet e BE-së që nuk e njeh Kosovën”, shkruan “El Periodico”.
Spanja, thekson shtypi, ende zyrtarisht e konsideron Kosovën një krahinë autonome të Serbisë, si dhe Greqinë, Sllovakinë, Rumaninë dhe Qipron.
Megjithatë, ajo thekson se “paradokset ekzistojnë brenda paradokseve”, dhe kështu Albin Kurti, ndonëse Spanja nuk e njeh Kosovën, është pritur në Madrid dhe Granadë gjatë dy udhëtimeve të tij të fundit në Spanjë, madje në nëntor të vitit 2022 ka ardhur në një takim e cila drejtohej nga Pedro Sánchez, dhe me atë rast u prit edhe nga një “mik personal spanjoll”, ish-sekretari i përgjithshëm i NATO-s, Javier Solana.
“Përfaqësuesit e Kosovës shkuan në Spanjë si delegacion zyrtar në Asamblenë Parlamentare të NATO-s, edhe në nëntor të vitit 2022. Dhe në tetor 2023, përfaqësuesit e qeverisë së Kosovës erdhën në Samitin e liderëve evropianë të mbajtur në Granada, nën presidencën spanjolle të Bashkimit Evropian. Sigurisht që nuk u mirëpritën me himnin kombëtar dhe flamurin”, kujton gazeta, transmeton KO.
Po ashtu, lëvizjen e lirë të qytetarëve të Kosovës ndërmjet kufijve të vendeve evropiane të zonës Shengen e ka promovuar dhe festuar Josep Borrell, përfaqësuesi i lartë për politikën e jashtme dhe të sigurisë të BE-së dhe figura më e madhe që ka Spanja në BE.
Gazeta thekson gjithashtu se 22 mijë ushtarë spanjollë kanë marrë pjesë në misionin e KFOR-it të NATO-s për ruajtjen e sigurisë së Kosovës, gjë që nuk është paradoksale.
Nëse kjo hapje do të bëhet shtysë për hapjen e një zyre – në mungesë të një misioni diplomatik – për Kosovën në Madrid, është diçka që përfundimisht do të vendoset këtë vit. Për autoritetet e Kosovës, njohja e Spanjës është një çelës në kuadrin strategjik të përcaktuar nga pushtimi rus i Ukrainës dhe gjendja e tensionit mes Evropës Perëndimore dhe Moskës, por edhe në balancën e stabilitetit në Ballkan, Kosova është një vend kyç, një vijë fërkimi mes ndikimi i aleancës së NATO-s dhe joshja ruse e Serbisë fqinje”, përfundon “El Periodico”.
