Ambasadori i Mbretërisë së Bashkuar, Nicholas Abbott, ka takuar sot zëvendëskryeministrin Besnik Bislimi, me ç’rast ka kërkuar që të ketë një periudhë tranzicioni për rregulloren e re të Bankës Qendrore të Kosovës.
“Sot pasdite mbajta takimin tim lamtumirës me zëvendëskryeministrin Besnik Bislimi.
Ne diskutuam ngjarjet e fundit, duke përfshirë pikëpamjen e Mbretërisë së Bashkuar se zbatimi i rregullores së re të BQK-së për operacionet me para të gatshme kërkon një periudhë tranzicioni për të mundësuar një fushatë të plotë informuese dhe për të mos lejuar asnjë ndërprerje në ofrimin e shërbimeve thelbësore”, ka shkruar ambasadori Abbott.
Ata gjithashtu kanë diskutuar për bashkëpunimin për forcimin e administratës tatimore dhe doganave të Kosovës, si dhe për reflektimin në dialogun e lehtësuar nga BE-ja me Serbinë.
