Shtetet e Bashkuara vendosën sanksione ndaj shtatë shtetasve ukrainas dhe katër subjekteve ukrainase, për përpjekje për të ndërhyrë në zgjedhjet presidenciale të nëntorit.
Departamenti amerikan i Thesarit tha se personat e sanksionuar janë: Oleksandr Dubynskiy, Dmytro Kovalchuk, Kostyantyn Kulyk, Oleksandr Onyshchenko, Anton Symonenko, Andriy Telizhenko dhe Petro Zhuravel.
Katër ueb-faqe dhe grupe mediatike - Era-Media, Onli n’Yuz, Nabuleaks dhe Skeptik - u sanksionuan po ashtu.
Sipas sekretarit amerikan të Shtetit, Mike Pompeo, të gjithë të sanksionuarit janë “pjesë e një rrjeti të inteligjencës, të lidhur me Rusinë dhe me Andriy Derkachun”, i cili është sanksionuar në shtator.
Derkach, anëtar i Parlamentit ukrainas, “ka qenë agjent aktiv rus për më shumë se një dekadë”, tha Pompeo.
Derkach ka qenë i lidhur me një përpjekje të Rudy Giulianit - avokatit personal të presidentit amerikan, Donald Trump - për të gjetur informacione komprometuese për ish-nënpresidentin amerikan, Joe Biden, i cili garonte kundër Trumpit në zgjedhjet e vitit 2020 dhe përfundimisht e mundi atë.
Pompeo nuk e përmendi të hënën as Bidenin, as Trumpin, por tha se sanksionet kanë në shënjestër “përhapjen dhe promovimin e koordinuar të akuzave mashtruese ose të pabazuara, që përfshijnë një kandidat politik amerikan”.
“Ata kanë bërë vazhdimisht deklarata publike, duke i avancuar rrëfimet keqdashëse se zyrtarët e Qeverisë amerikane janë përfshirë në marrëdhënie korruptive në Ukrainë”, tha Pompeo./REL
