Historia e problemeve të zemrës dhe presionit të lartë të gjakut të Presidentit meksikan, Andres Manuel Lopez Obrador do të komplikojnë përpjekjet e mjekëve për të luftuar infeksionin COVID-19.
67-vjeçari, i cili ishte një duhanpirës i rëndë derisa pësoi një sulm serioz në zemër në 2013, u tha të dielën se po trajtohej për simptoma të lehta të COVID-19.
“Profesionistët shëndetësorë po monitorojnë vazhdimisht në rast se ka një shenjë alarmi që mund të çojë në shtrim në spital”, tha zyrtari shëndetësor Jose Luis Alomia Zegarra, në një konferencë shtypi të rregullt në mbrëmje.
Çdokush me profilin shëndetësor të Lopez Obrador do të vëzhgohej nga afër, duke përfshirë “monitorimin e rregullt të shenjave vitale, të oksigjenimit”, shtoi Alomia, në përgjigje të pyetjeve rreth problemeve të kaluara të presidentit me zemrën dhe presionit të lartë të gjakut.
Megjithëse Lopez Obrador është zotuar të vazhdojë të punojë, ai tha tani për tani se do të tërhiqet nga konferencat e lajmeve të përditshme në orën 7 të mëngjesit që kanë përshkuar strukturën e jetës politike meksikane që kur ai mori detyrën në dhjetor 2018.
Zyrtarët e ministrisë së shëndetësisë thanë se gjurmimi i kontakteve të fundit të Lopez Obrador ka filluar. Disa bashkëpunëtorë të afërt kanë marrë virusin gjatë pandemisë dhe ai gjithmonë ka këmbëngulur se është mirë me shëndet.
Lopez Obrador hoqi dorë nga pirja e duhanit pas sulmit të tij në zemër në 2013 dhe thotë se që atëherë është kujdesur shumë për veten e tij.
Pavarësisht popullaritetit të tij të rritur gjatë pandemisë, menaxhimi i tij i krizës ka tërhequr kritika të ashpra nga kundërshtarët politikë, të cilët thonë se ai e ka minimizuar shumë shpesh atë, duke marrë hapa joadekuat për ta luftuar atë.
Dy paraardhësit e menjëhershëm të Lopez Obrador, Enrique Pena Nieto dhe Felipe Calderon, i uruan shërim të shpejtë.
