Pas çdo aktakuze të re, Donald Trump është mburrur se pozita e tij mes republikanëve vetëm po përmirësohet dhe ai ka të drejtë.
Gati dy të tretat e republikanëve – 63 për qind – tani thonë se duan që ish-presidenti të kandidojë sërish, sipas sondazhit të ri nga Qendra për Kërkime për Çështjet Publike të Associated Press.
Kjo është pak më shumë nga 55 për qind, që thanë të njëjtën gjë në prill kur Trumpi filloi të përballej me një sërë akuzash penale. Shtatë në 10 republikanë tani kanë një opinion të favorshëm për Trumpin, një rritje nga 60 për qind, që e thanë këtë dy muaj më parë.
Por në një shenjë paralajmëruese vendimtare për ish-presidentin dhe mbështetësit e tij, Trumpi përballet me dobësi të dukshme drejt zgjedhjeve të përgjithshme, pasi shumë amerikanë janë thellësisht kundër tij. Ndërsa shumica e republikanëve – 74 për qind – thonë se do ta mbështesin atë në nëntor 2024, 53 për qind e amerikanëve thonë se definitivisht nuk do ta mbështesnin nëse ai do të ishte kandidati. 11 për qind të tjerë thonë se ndoshta nuk do ta mbështesin atë në nëntor 2024.
Gjetjet forcojnë argumentet e disa prej rivalëve të Trumpit për nominimin republikan, të cilët lavdërojnë mandatin e tij si president, por paralajmërojnë se ai nuk mund të fitojë në zgjedhjet e përgjithshme kur duhet të konkurrojë për vota përtej bazës së Partisë Republikane (GOP). Trumpi humbi votën popullore në fushatën e vitit 2016, duke arritur presidencën vetëm duke fituar shumicën në Kolegjin Zgjedhor. Ai humbi ndaj demokratit Joe Biden, me një diferencë edhe më të madhe prej 7 milionë votash në vitin 2020, një humbje që ai ia atribuoi rrejshëm mashtrimit të gjerë të votave.
Disa republikanë, të cilët po e shtyjnë partinë të tejkalojë Trumpin, argumentojnë se pozita e tij me publikun e gjerë është përkeqësuar vetëm që nga zgjedhjet e fundit presidenciale, e ndikuar nga roli i tij në ndezjen e trazirave të dhunshme të 6 janarit 2021, në Kapitolin e SHBA-së dhe për trazirat konstante që e rrethojnë atë, të mishëruara nga problemet e tij të paprecedenta ligjore.
“Ka një numër domethënës votuesish që kanë votuar dy herë për Trumpin dhe nuk mund ta votojnë përsëri pas gjithë kësaj”, tha Sarah Longwell, një stratege republikane anti-Trump që ka drejtuar grupe fokusi me votuesit republikanë.
Për ta përkeqësuar edhe më shumë situatën e Trumpit, sondazhi zbuloi se kundërshtimi ndaj rizgjedhjes së Bidenit nuk është aq i rrënjosur. Presidenti 80-vjeçar, i cili përballet vetëm me rivalë nominalë në zgjedhjet paraprake demokrate, përballet me skepticizëm midis votuesve, veçanërisht mbi moshën e tij. Por vetëm 43 për qind e amerikanëve thonë se definitivisht nuk do ta mbështesin atë në zgjedhjet e përgjithshme, me 11 për qind të tjerë që thonë se ndoshta nuk do ta mbështesnin.
Zyrtarët e zgjedhjeve federale dhe shtetërore dhe vetë prokurori i përgjithshëm i Trumpit kanë thënë se nuk ka prova të besueshme që zgjedhjet ishin të njollosura. Akuzat e ish-presidentit për mashtrim u refuzuan gjithashtu nga gjykatat, duke përfshirë edhe gjyqtarët e emëruar nga Trumpi. Dhe në Gjeorgji, shteti në qendër të aktakuzës së tij të fundit, u kryen tre rinumërime pas zgjedhjeve – secila prej të cilave konfirmoi humbjen e tij ndaj Bidenit.
“Trump duhet të mishërojë ankesat e votuesve dhe jo ankesat e tij”, tha Longwell.
“Sa herë që ai flet për vitin 2020, ai shikon prapa, ndërsa votuesit entuziazmohen më shumë për të parë përpara”.
Rich Stricklett, një republikan dhe mbështetës i Trumpit nga Bondurant, Iowa, u pajtua me cilësimin e akuzave nga ana e Trumpit si një “gjueti shtrigash”.
“Mendoj se është e shtyrë politikisht për të rrëzuar një kandidat që është një kërcënim për presidentin aktual”, tha ai.
Mary Kinney, një republikane nga Des Moines, e cila mbështeti Trumpin në vitin 2016, ishte gjithashtu kritike ndaj akuzave.
“Duket sikur ata thjesht po hedhin ndonjë gjë në mur për të parë nëse do të ngjitet, sepse kanë shumë frikë prej tij”, tha ajo, raporton AP.
Por të tjerë paralajmërojnë se do të ishte e parakohshme të supozohej se problemet ligjore të Trumpit do të çonin në rënien e tij politike. Ish-guvernatori i Wisconsin, Scott Walker, i cili kandidoi kundër Trumpit në zgjedhjet paraprake të GOP të vitit 2016, tha se ishte skeptik se presidenti i dikurshëm do të përballej me pasoja politike nga dramat e sallës së gjyqit.
Ish-kryetari i Dhomës së Përfaqësuesve, Newt Gingrich, një aleat i Trumpit, i cili i cilësoi akuzat si “të neveritshme”, parashikoi se ato do të “tërbonin vendin” dhe do ta ndihmonin Trumpin, edhe në zgjedhjet e përgjithshme.
“Unë mendoj se çdo amerikan që kujdeset për sundimin e ligjit duhet të zemërohet nga ajo që panë”, tha Gingrich. “Ai do të jetë më i fortë dhe do të fitojë zgjedhjet e përgjithshme”.
