Uragani i kategorisë 4, Hilary u përplas drejt gadishullit Baja California të Meksikës të premten, tha një agjenci qeveritare amerikane, ndërsa lëshoi paralajmërimin e parë të stuhisë tropikale për Kaliforninë, si dhe paralajmëroi për përmbytje kërcënuese për jetën dhe ndoshta katastrofike.
Qendra Kombëtare e Uraganeve (NHC), pret që stuhia e fuqishme të arrijë pranë qytetit turistik të njohur të Meksikës Cabo San Lucas, deri në orët e vona të së premtes, megjithëse duhet të dobësohet përpara se të godasë Bregun Perëndimor të ShBA-së këtë fundjavë, por që do të sjellë shira të rrezikshëm.
Gadishulli Baja California i Meksikës përfshin dy shtete.
Ai më veriori, anuloi aktivitetet publike jothelbësore të premten, duke përfshirë mësimin në shkolla deri të hënën, dhe autoritetet në qytetin e dytë më të madh të Meksikës, Tijuana, u kërkuan njerëzve në zonat me rrezik të lartë të transferoheshin në strehimore të përkohshme.
Në shtetin jugor të gadishullit, autoritetet shtynë një ndeshje bejsbolli dhe thanë se portet do të mbylleshin deri të premten vonë.
“Pa u alarmuar, të gjithë duhet të marrim masa paraprake dhe të rezervojmë ujë dhe nevojat themelore në shtëpi, pa iu drejtuar blerjeve në panik”, tha guvernatori i shtetit.
Zëvendësdrejtori i NHC-së, Jamie Rhome, paralajmëroi për rreziqet e përmbytjeve nga San Diego në Los Angeles dhe Las Vegas, me rreziqe veçanërisht të larta rreth zonës Palm Springs, raporton Reuters.
