Stuhia tropikale Italia pritet të forcohet në një uragan ndërsa lëviz drejt bregut të Floridës në Gjirin e Meksikës, ku autoritetet po u bëjnë thirrje miliona banorëve që të përgatiten për t’u evakuuar përpara mbërritjes së saj herët në mëngjesin e së mërkurës me orën lokale.
Stuhia, me erëra prej 105 km/h, ishte rreth 150 km në perëndim të Kubës këtë pasdite dhe lëvizte në veri me rreth 12 km/h, tha Qendra Kombëtare e Uraganeve. Vlerësohet se deri në 20 milionë banorë të Floridës mund të preken nga kjo ngjarje ekstreme e motit.
Italia parashikohet të jetë një uragan i kategorisë 3 në shkallën Saffir-Simpson kur të zbresë në zonën Big Bend të Floridës. Guvernatori i shtetit Ron DeSandis, në një konferencë për shtyp që dha, u bëri thirrje të gjithë banorëve të përgatiten. “Ky është një uragan i madh. Do të jetë një uragan i fuqishëm dhe patjetër do të prekë shtetin e Floridës”, theksoi ai.
Zyrtarët lokalë tashmë po përgatiten të lëshojnë urdhra evakuimi, shtoi guvernatori, duke vënë në dukje gjithashtu se ndërprerjet e energjisë elektrike janë të mundshme. “Mos harroni, nëse ju thonë të largoheni, nuk keni pse të bëni qindra kilometra, nuk keni pse të largoheni nga shteti. Thjesht duhet të lëvizësh në terrene me lartësi më të madhe, “tha DeSandis.
Disa shkolla pritet të pezullojnë mësimin. Shira të rrëmbyeshëm parashikohen për Bregun e Gjirit të Floridës , Gjeorgjinë juglindore dhe Karolinën Veriore dhe Jugore lindore nesër të martën.
Ashtu si shumë komunitete bregdetare, qyteti i Bradenton u bëri thirrje 55,000 banorëve të tij që të jenë në gatishmëri.
DeSandis ka vënë në gatishmëri 46 qarqe të Floridës, që do të thotë pjesën më të madhe të veriut të shtetit. 5500 anëtarë të Gardës Kombëtare dhe dhjetëra automjete dhe avionë janë mobilizuar gjithashtu për operacionet e kërkim-shpëtimit.
Përveç mijëra punëtorëve që do të sigurohen që energjia të rivendoset shpejt pas kalimit të uraganit, shteti ka siguruar gjithashtu rreth 11.5 milionë litra ujë të pijshëm dhe 1.5 milionë vakte për njerëzit që do të kenë nevojë për ndihmë, tha DeSandis.
