Vullkani Kilauea në Hawai, një nga më aktivët në botë, ka shpërthyer përsëri dje duke lëshuar llavë deri në 20 metra lartësi.
Kilauea u pa të niste erupsionin e fundit rreth orës lokale 3:15 sipas shërbimit të gjeologjisë së SHBA.
“Shpërthimit i parapriu një periudhë e zgjatur dridhjesh sizmike”, thuhej në njoftim duke shtuar se kjo është hera e tretë që vullkani vjen në jetë këtë vit, duke nisur nga janari.
Në pamjet nga vendngjarja shihej që llava dilte nga disa çarje të ndryshme në krater.
“Fillimisht lëshimi i llavës kishte lartësi të konsiderueshme, por tashmë lartësia e saj mbetet në 20-25 metra”, thanë monitoruesit duke dhënë paralajmërime për shikueshmërinë dhe fluturimet në rajon.
Kilauea është pjesë e parkut kombëtar vullkanik në ishullin Big Island, që gjendet larg zonave të banuara.
“Për momentin shpërthimi në Kilauea është i kufizuar te maja e malit dhe nuk kërcënon komunitetet, por gazet mund të krijojnë probleme për njerëzit që ekspozohen ndaj tyre”, njoftonin autoritetet në rrjetet sociale.
Kilauea është relativisht më i vogël se vullkani fqinjë Mauna Loa por shumë më aktiv se ai dhe vizitohet me helikopter nga turistë për pamjet e llavës që skuq shpatet e tij.
Kilauea është një nga gjashtë vullkanet aktive në ishujt e Hawai dhe ka shpërthyer vazhdimisht në vitet 1983 e 2019, shkruan rrjeti AFP.
