Dy ushtarë amerikanë humbën jetën dhe 12 tjerë u lënduan, pasi një vetura u rrokullis në një rrugë që çonte në bazën e trajnimit në Alaska, ka bërë të ditur zëdhënësi John Pennell, që konfirmoi se aksidenti ndodhi dje derisa po shkonin në qendrën trajnuese Yukon në afërsi të Salche që është rreth 50 kilometra në juglindje të Fairbanks.
Në mjetin transportues në momentin e aksidentit ndodheshin 17 ushtarë, kurse ekipet emergjente dolën menjëherë në vendin e ngjarjes për të ndihmuar 12 ushtarët e lënduar.
Pennell theksoi se dy ushtarët me lëndime më të rënda janë dërguar me autoambulancë në qendrën klinike Providence në Anchorage.
“Jemi të shokuar dhe e gjithë njësia jemi të gatshmë të ofrojmë ndihmën e nevojshme për familjet e dy ushtarëve të vdekur por edhe të atyre që janë në spital”, shtoi ai.
Deri më tani akoma nuk dihen shkaqet që quan në rrokullisjen e mjetit, shkruan Associated Press. E Pennell tha se duke marrë parasysh se ka të vdekur, ushtria në Alabama do të dërgojë një ekip hetues.
Emrat e dy ushtarëve pritet të zbulohen nesër, pasi që familjet e tyre të informohen për çdo detaj. Ky është rasti i dytë i një aksidenti të tillë në Alaskë që po i ndodhë ushtrisë amerikane.
