Shirat e rrëmbyeshëm, përmbytjet dhe erërat e fuqishme të shkaktuara nga stuhia tropikale “Pilar” kanë vrarë dy persona dhe kanë lënë një të zhdukur në El Salvador të Amerikës Qendrore, sipas zyrtarëve të martën.
Shirat dhe erërat me shpejtësi 50 mph (80 km/h) kërcënojnë zonat bregdetare të Paqësorit të Kosta Rikës, El Salvadorit, Guatemalës, Hondurasit, Nikaraguas dhe Kolumbisë, tha Qendra Kombëtare e Uraganeve të SHBA-së.
Një mashkull 24-vjeçar dhe një femër 57-vjeçare u "rrëmbyen" nga rrymat e forta në rajonin e La Union, 200 kilometra (124 milje) në lindje të San Salvadorit, thanë autoritetet. Një 18-vjeçar është raportuar i zhdukur në plazhin e San Diegos, 40 kilometra në jug të kryeqytetit, tha zëvendësdrejtori i Mbrojtjes Civile, Fermin Perez.
Vendi i Amerikës Qendrore ka shpallur gjendjen e jashtëzakonshme kombëtare që u miratua të dielën vonë nga Asambleja Legjislative. Autoritetet e mbrojtjes civile kanë ngritur 120 strehimore në të gjithë vendin.
Nikaragua shpalli alarmin e verdhë në të gjithë vendin.
Pilar do të shkaktojë "shira të rrëmbyeshëm", erëra dhe dallgë të martën në Meksikën juglindore, njoftoi Shërbimi Meteorologjik Kombëtar. Stuhia Pilar vjen pasi uragani Otis, një stuhi e kategorisë 5, zbarkoi të mërkurën e kaluar në shtetin jugor të Guerrero, duke shkaktuar dëme dhe duke lënë 46 të vdekur dhe gati 60 të zhdukur.
