Presidenti amerikan, Joe Biden beson se një armëpushim në luftën që po zhvillohet në Lindjen e Mesme, nuk do të mund të sjellë kurrë paqe.
“Një armëpushim në luftën midis Izraelit dhe Hamasit nuk do të sjellë paqe”, tha ai.
Biden tha se, Hamasi thjesht do ta shfrytëzonte atë për të “rindërtuar rezervat e raketave, për të rivendosur luftëtarët dhe për të rifilluar vrasjen duke sulmuar përsëri të pafajshmit”.
“Për sa kohë që Hamasi i përmbahet ideologjisë së tij të shkatërrimit, një armëpushim nuk është paqe,” shkroi ai në një artikull opinion në Washington Post.
Biden tha se Hamasi u fsheh “midis civilëve palestinezë”, përdori “fëmijët dhe të pafajshmit si mburoja njerëzore” dhe vendosi “tunele terroriste poshtë spitaleve, shkollave, xhamive dhe ndërtesave të banimit”.
“Nëse Hamasi do të kujdesej fare për jetët e palestinezëve, do të lironte të gjithë pengjet, do të hiqte dorë nga armët dhe do të dorëzonte liderët dhe ata që janë përgjegjës për 7 tetorin”, tha ai.
Ai propozoi që një Autoritet Palestinez duhet të qeverisë Gazën dhe Bregun Perëndimor pas luftës si një njësi e vetme derisa të arrihet përfundimisht një zgjidhje me dy shtete, shkruan The Telegraph.
