Kina dhe Kuba kanë arritur një marrëveshje sekrete që lejon Pekinin të ndërtojë një objekt përgjimi elektronik në ishullin që është 160 kilometra larg Shteteve të Bashkuara, njoftuan të enjten mediat amerikane.
Një zyrtar i lartë i Shtëpisë së Bardhë i cilësoi njoftimet si "jo të sakta" pa specifikuar se çfarë kundërshton në këto raporte.
Sipas raporteve, të cilat u shfaqën për herë të parë në gazetën The Wall Street Journal, objekti i spiunazhit do t'i lejonte Kinës të mblidhte komunikime elektronike nga e gjithë juglindja e SHBA-së, ku ndodhen baza të shumta ushtarake, dhe të monitoronte trafikun e anijeve amerikane.
I pyetur për raportin, një zëdhënës i Ambasadës Kineze në Uashington i tha agjencisëReuters: "Ne nuk jemi në dijeni të rastit dhe si rezultat nuk mund të japim një koment tani".
Zyrtarët e inteligjencës amerikane të njohur me projektin u cituan në mënyrë anonime të kenë thënë se Kina ka rënë dakord t'i paguajë Kubës me vështirësi financiare, disa miliarda dollarë për të drejtën e ndërtimit të objektit, megjithëse nuk dihet se kur mund të jetë funksional projekti .
Objekti i mundshëm ka alarmuar administratën e presidentit Joe Biden për shkak të afërsisë me Shtetet e Bashkuara, thuhet në raportet. Shtëpia e Bardhë dhe shumë ligjvënës në Kongres e konsiderojnë Kinën si rivalin kryesor ekonomik dhe ushtarak të SHBA-së. SHBA është ekonomia më e madhe në botë dhe Kina e dyta.
Në fillim të këtij viti, SHBA-të rrëzuan një balonë spiune kineze mbi Oqeanin Atlantik, por jo përpara se ajo të përshkonte gjerësinë e Shteteve të Bashkuara dhe të fluturonte mbi baza të shumta ushtarake. Fundjavën e kaluar, një luftanije kineze lundroi befas nëpër harkun e një destrojeri amerikan ndërsa kalonte nëpër ujërat ndërkombëtare në ngushticën e Tajvanit. Shtetet e Bashkuara thanë se incidenti e detyroi anijen amerikane të ngadalësonte shpejtësinë për të shmangur një përplasje.
Një zyrtar i Departamentit amerikan të Mbrojtjes tha se SHBA-ja nuk do të komentonte drejtpërdrejt mbi raportet e një objekti të planifikuar kinez në Kubë.
“Në një nivel më të gjerë, ne jemi shumë të vetëdijshëm për përpjekjet e [Kinës] për të investuar në infrastrukturë në mbarë botën që mund të kenë qëllime ushtarake, përfshirë hemisferën perëndimore,” tha zyrtari. “Ne do të vazhdojmë ta monitorojmë nga afër dhe do të mbetemi të sigurt se jemi në gjendje të përmbushim të gjitha angazhimet tona të sigurisë në vend dhe në të gjithë rajonin.”
Zyrtarët amerikanë besojnë se objekti kinez në Kubë do të lejonte Pekinin të kryente inteligjencë sinjalesh, të cilat mund të përfshijnë monitorimin e një sërë komunikimeve, duke përfshirë emailet, thirrjet telefonike dhe transmetimet satelitore, thanë agjencitë e lajmeve.
Kundërshtarët republikanë të Bidenit sulmuan shpejt administratën në lidhje me sipërmarrjen kineze në hemisferën perëndimore, megjithëse ishte e paqartë se çfarë, mund të bënin SHBA-të për ta ndaluar atë.
“Joe Biden duhet të zgjohet me kërcënimet reale kineze në derën tonë”, shkroi në Twitter Nikki Haley, ish-ambasadore në Kombet të Bashkuara dhe një kandidate presidenciale republikane.
Senatori Marco Rubio i Floridës, shteti më i afërt amerikan me Kubën, tha në Twitter: “Kërcënimi ndaj Amerikës nga Kuba nuk është vetëm real, por është shumë më i keq se ky”./VOA
