LIVE: Tensione të mëdha/ Ky është plani i Izraelit për të shkatërruar Hamasin – ja thirrja nga SHBA!

Të paktën 14 kamionë me ndihma humanitare, të sponsorizuar nga Gjysmëhëna e Kuqe egjiptiane dhe Kombet e Bashkuara, u panë duke hyrë në Rripin e Gazës nga Egjipti.

Ata hynë përmes vendkalimit Rafah të dielën vonë në mbrëmje me orën lokale.

Një zyrtar i Shoqatës Palestineze të Gjysmëhënës së Kuqe në Gaza konfirmoi për CNN se këta kamionë kanë hyrë në Gaza.

Aktualisht, kamionët janë duke u shkarkuar për të vazhduar në objektet e magazinimit të Gazës të UNRWA, agjencia e Kombeve të Bashkuara për refugjatët palestinezë.

Një video e rëndë e publikuar nga Al Jazeera tregon momentin kur një punonjës shpëtimi vrapon drejt një rruge në Gaza derisa në sfond dëgjoheshin së paku tre shpërthime nga sulmet ajrore që godisnin ndërtesat shumë afër tij.

Përveç tij, në video mund të shiheshin edhe një familje tjetër që po vraponin për sigurinë e tyre.

 

 

 

 

View this post on Instagram

 

 

 

 

 

 

 

 

 

 

 

A post shared by Al Jazeera English (@aljazeeraenglish)

Një vajzë mund të dëgjohet duke qarë e duke vrapuar në drejtim të këtij burri i cili e mori për pak çaste në përkujdesje, më pas u afruan edhe familjarët e vogëlushes.

Derisa vraponin për të ikur nga bombardimet drejt një strehe të sigurt në video mund të dëgjoheshin shpërthime të forta nga sulmet.

Palestinezi vazhdimisht në fillim të videos mund të dëgjohet derisa thotë: “Nuk ka Zot tjetër, përveç Allahut”. Zëri i tij dridhej derisa përsëriste frazën.

Izraeli ka njoftuar se do të shkatërrojë Hamasin pas një sulmi brutal nga militantët e Hamasit më 7 tetor. Por cili është saktësisht plani i Izraelit?

Avi Melamed, një ish-zyrtar i inteligjencës izraelite, tha se Forcat e Mbrojtjes së Izraelit (IDF) dhe agjencia e inteligjencës izraelite Mossad do të kthehen në tri mënyra për të gjuajtur objektivat e tyre në Gaza.

"Ekziston një thënie në inteligjencën izraelite që nuk ka njeri në këtë planet që nuk mund të arrihet," tha Melamed.

Tri qasjet janë inteligjenca njerëzore (HUMINT), e cila përfshin spiunët dhe informatorët, inteligjenca vizuale (VISINT), e cila përfshin mbikëqyrjen ajrore dhe SIGINT, e cila qëndron për përgjimin e komunikimeve të Hamasit.

Strategu ushtarak i Hamasit, Mohammed Deif dhe lideri politik Yahya Sinwar konsiderohen si objektivat kryesore të IDF. Por Melamed deklaron se eliminimi i të dyve nuk do të çojë në shkatërrimin e Hamasit.

“Në rastin e ISIS-it, kokat eliminohen vazhdimisht, por së shpejti dikush tjetër zë vendin e tyre”, thotë ai.

Dr. H.A. Hellyer, një ekspert ndërkombëtar i sigurisë, është dakord. “Sinwar dhe Deif janë prioritetet, dhe humbja e këtyre dyve do të dëmtonte Hamasin, por supozohet se grupi ka skenarë në vend nëse bëhet fjalë për këtë”, tha ai për Express.co.uk.

Deri më tani, Izraeli ka qenë në gjendje të eliminojë vetëm anëtarët e rangut të mesëm dhe të ulët të Hamasit. Ata vranë Jehad Mheisen, kreun e forcave të sigurisë kombëtare të Hamasit, në një sulm ajror këtë javë, si dhe Ayman Nofal, komandantin e divizionit të armatosur qendror të Hamasit.

Shin Bet, agjencia e sigurisë së brendshme të Izraelit, vrau Rafat Harev Hossein Abu Halal, udhëheqësin e krahut të armatosur të Komitetit të Rezistencës Popullore (PRC), grupi i tretë terrorist më i madh në Gaza pas Xhihadit Islamik dhe Hamasit.

Ndërsa 15 gazetarë janë vrarë gjatë javës së parë të konfliktit mes Izraelit dhe Hamasit, përfshirë një kameraman të agjencisë së lajmeve Reuters, redaksitë e lajmeve dhe specialistët e sigurisë po shqyrtojnë mënyrat për të mbrojtur ekipet mediatike që raportojnë nga fusha e betejës.

Kryeredaktorja e agjencisë së lajmeve Reuters, Alessandra Galloni, i bën homazh kameramanit Issam Abdallah, i cili u vra nga goditja e një predhe më 13 tetor, ndërsa filmonte luftimet ndërkufitare midis forcave izraelite dhe Hezbollahut, një grup militant në Liban.

“Ai u vra në krye të detyrës. Raportimi i ngjarjeve botërore me saktësi, integritet, pavarësi dhe paanësi është shtyllë themelore e agjencisë së lajmeve Reuters”, thotë zonja Galloni.

Predha, për të cilën raportet se e kishte origjinën në Izrael, plagosi gjashtë gazetarë të tjerë. Kryeredaktorja Galloni bëri thirrje për transparencë në hetimin e Izraelit për incidentin, ndërsa theksoi nevojën që media të jetë në gjendje të raportojë për luftën.

“Është jashtëzakonisht e rëndësishme që gazetarët tanë të jenë në gjendje të raportojnë pa rrezikuar jetët e tyre”.

Siguria është elementi themelor për redaksitë që dërgojnë ekipe në Izrael dhe Gaza. Në javën e parë të konfliktit, të paktën 15 gazetarë, përfshirë zotin Abdallah, u vranë, thotë Komiteti për Mbrojtjen e Gazetarëve.

Gazetarë të tjerë janë plagosur ose penguar, në atë që UNESCO thotë se është java e parë më vdekjeprurëse për gazetarët në çdo konflikt të fundit. Por prania e medias në terren në kohë lufte është jetike.

“Prania e gazetarëve për të raportuar zhvillimet është shumë kritike për të kuptuar se çfarë po ndodh, për përgjegjshmërinë, veçanërisht duke patur parasysh numrin e civilëve në këtë mes”, thotë zonja Rachel Oswald me Klubin Kombëtar të Shtypit.

Është e domosdoshme që gazetarët të raportojnë lajme të verifikuara dhe të bazuar në fakte të luftës mes Izraelit dhe Hamasit, thotë Rachel Oswald, kryetare e Komitetit të Lirisë së Shtypit në Klubin Kombëtar të Shtypit.

“Po shohim të gjitha palët në konflikt që përpiqen të dominojnë skenën informative me gënjeshtra, me dezinformata, me imazhe të manipuluara. Prania e gazetarëve është thelbësore për të raportuar faktet”.

Ndërsa rreziqet ndaj gazetarëve po shtohen në shkallë botërore, trajnimi dhe këshillimi për sigurinë po zhvillohen qysh në fazat e hershme, përfshirë programet e gazetarisë në shkollat e mesme dhe universitete.

Fondacioni për Trashëgiminë James W Foley, i cili mbron sigurinë e gazetarëve dhe amerikanëve të ndaluar pa të drejtë jashtë vendit, ka ngritur një grup pune për trajnimin dhe mbështetjen e brezit të ri të gazetarëve.

Çelësi i trajnimit dhe përgatitja për të mbuluar një situatë të rrezikshme është hartimi i një plani. Këtu përfshihet bashkëpunimi me individë që e njohin rajonin dhe koordinimi me drejtuesit e redaksisë së lajmeve.

Specialistët e sigurisë thonë se është gjithashtu thelbësore patja e një plani largimi në rast se situata bëhet shumë e rrezikshme.

“Nëse dikush është në një situatë të rrezikshme, ata e dinë më mirë se çfarë po ndodh. Është detyra e vet gazetarit që të marrë vendimin dhe ta njoftojë redaksinë”, thotë Jason Reich i cili drejton çështjet e sigurisë pranë gazetës New York Times.

Ndërsa shtohet numri i civilëve të vrarë dhe të plagosur në konfliktin mes Izraelit dhe Hamasit, më shumë gazetarë po shkojnë në rajon për të mbuluar luftën dhe siguria është një pjesë thelbësore e planifikimit të redaksive të lajmeve./VOA

Qeveria amerikane i ka bërë presion Izraelit që të shtyjë ofensivën tokësore në Gaza për të lejuar lirimin e më shumë pengjeve dhe ndihmave të Hamasit në Gaza, sipas dy burimeve të informuara mbi diskutimet.

Lirimi dy amerikanëve të premten nga Hamasi sinjalizoi lirimin e mundshëm të më shumë prej rreth 200 personave që besohet se janë rrëmbyer nga grupi militant pas sulmeve të tij vdekjeprurëse dy javë më parë, raporton CNN, përcjell Telegrafi.

“[Administrata] i bëri presion udhëheqjes izraelite që të shtyjë ofensivën për shkak të përparimit në frontin e pengjeve dhe nevojës për të dërguar kamionë me ndihma në Gaza’, tha një person i njohur me diskutimet.

Këshilli i Sigurisë Kombëtare nuk u përgjigj menjëherë për koment.

Kur presidenti amerikan Joe Biden u pyet të shtunën nëse po e inkurajonte Izraelin të shtynte pushtimin, ai u përgjigj: “Po flas me izraelitët”.

Papa Fracesku kërkoi fundin e konfliktit mes Izraelit dhe militantëve të Hamasit, duke u lutur për lirimin e pengjeve, dhe vazhdimësinë e ndihmave për popullsinë në Gaza.

“Lufta është gjithmonë një humbje”, deklaroi Kreu i Selisë së Shenjtë, për besimtarët e mbledhur në sheshin Shën Pjetër në Vatikan.

“Edhe një herë mendimet e mia shkojnë për atë që po ndodh në Izrael dhe Palestinë. Jam shumë i shqetësuar dhe hidhëruar. Lutem dhe jam afër të gjithë atyre që po vuajnë; pengjet, të plagosurit, viktimat dhe familjarët e tyre.

Mendoj për situatën e rëndë humanitare në Gaza dhe jam i trishtuar që spitali Anglikan dhe Kisha Ortodokse Greke janë goditur së fundmi. Ripërtërij thirrjen për hapjen e hapësirave në mënyrë që ndihmat të vazhdojnë të hyjnë në Gaza dhe që pengjet të lirohen.

Lufta, çdo luftë në botë, dhe mendoj gjithashtu Ukrainën e martirizuar, është një disfatë. Lufta është gjithmonë një humbje. Është shkatërrim i vëllazërisë njerëzore. Vëllezër, ndaluni!”  

Më shumë se njëqind foshnje të porsalindura janë në rrezik pasi karburanti po mbaron në enklavën e rrethuar të Gazës, kështu paralajmëron agjencia e fëmijëve të OKB-së.

“Aktualisht kemi 120 të porsalindur që janë në inkubatorë, nga të cilët kemi 70 të porsalindur me ventilim mekanik, dhe sigurisht këtu jemi jashtëzakonisht të shqetësuar”, tha zëdhënësi i Unicef-it, Jonathan Crickx.

Izraeli urdhëroi një bllokadë të plotë të territorit pas sulmeve terroriste të Hamasit, në të cilat grupi islamik vrau 1,400 njerëz, kryesisht civilë, sipas zyrtarëve izraelitë.

Spitalet tani përballen me një mungesë të tmerrshme ilaçesh, karburanti dhe uji jo vetëm për mijëra të plagosur në më shumë se dy javë të luftës midis militantëve të Gazës dhe Izraelit, por edhe për pacientët e përditshëm.

Më herët të dielën e 22 Tetorit, Izraeli u dërgoi palestinezëve fletëpalosje duke i paralajmëruar se do të trajtoheshin si mbështetës të terroristëve nëse nuk iknin nga veriu në jug të Rripit të Gazës.

Paralajmërimi vjen pavarësisht se Izraeli ka akuzuar Hamasin në të kaluarën për përdorimin e civilëve si “mburoja njerëzore”./ The Telegraph

Kryeministri i Izraelit, Benjamin Netanyahu, ka paralajmëruar grupin Hezbollah që të mos hap një front të dytë lufte me Izraelin.

Do të bënte “gabimin e jetës” nëse do ta bënte një gjë të tillë, tha ai kur foli me trupat izraelite pranë kufirit me Libanin.

Ai tha se do të sillte kundërsulme izraelite të përmasave “të paimagjinueshme” që do të shkaktonin “shkatërrim” mbi Libanin.

Izraeli dhe SHBA-ja kanë paralajmëruar tashmë Hezbollahun të mbështetur nga Irani kundër hapjes së një fronti tjetër beteje në kufirin verior të Izraelit.

Grupi Hezbollah cilësohet një organizatë terroriste nga Britania e Madhe, SHBA-ja dhe vende të tjera

Ish-kryeministri i Izraelit akuzoi BBC-në për njëanshmëri dhe ‘mungesë të qartësisë morale’ në mbulimin e luftës Izrael-Hamas, pak para se të ndërpritet para kohe intervista e tij.

Gjatë debatit të nxehtë, Naftali Bennett tha të dielën në program: “Unë e kuptoj se BBC ka marrë anën e Gazës, sepse të gjitha pyetjet tuaja kanë të bëjnë vetëm me civilët e Gazës”.

Por ishte prezantuesja Victoria Derbyshire e cilam ë pas ndërhyri se “kjo nuk është e vërtetë” përpara se politikani izraelit të vazhdojë, duke iu referuar familjeve izraelite të vrarë nga militantët e Hamasit më 7 tetor.

“Nuk e keni bërë asnjë pyetje për ata fëmijë që në fillim të kësaj interviste, duke se shumë pak ju intereson për ta”, shtoi Bennett.

“Juve ju bën përshtypje vetëm një palë, kjo është mënyra e BBC-së. Nëse mendoni se ka baraspeshim këtu mes dy palëve, atëherë keni mungesë të qartësisë morale. BBC-ja më duhet të them ka mungesë të qartësisë morale. Ajo çfarë keni bërë javën e kaluar, turp ju qoftë”, shtoi ish-kryeministri izraelit.

Megjithatë kur Derbyshire tenton t’i përgjigjet transmetimi ndërpritet dhe nga ekrani televiziv “zhduket” Bennett. 

Ushtria izraelite ka njoftuar se Hamasi po mban peng në Gazë edhe 212 persona.

Dy shtetase amerikane u liruan të premten, që Hamasi e përshkroi si “gjest humanitar”.

Militantët e Hamasit pretendojnë se synojnë të lirojnë edhe dy pengje për “arsye humanitare”, por se “Izraeli” nuk është deklaruar.

Abu Ubaid, zëdhënësi i brigadës Izz el-Deen al-Qassam, ka thënë në një kumtesë të premten se ka informuar Katarin për synimet e tyre.

Megjithatë nuk kanë treguar nëse Izraelitët kanë refuzuar ndonjë kërkesë të tyre, e nga Tel Avivi kanë bërë të ditur se këto pretendime të tyre janë “propagandë”.