Të paktën 25 persona kanë mbetur të vdekur nga zjarri në zyrat e një kompanie minierash qymyri në Kinë.
Zjarri shpërtheu sot në mëngjes në ndërtesën e përbashkët të industrisë së qymyrit Yongju në qendrën kryesore të prodhimit të qymyrit në provincën Shanxi, raporton AlJazeera, transmeton Klankosova.tv.
Zjarri duket se ka nisur në ndërtesën katërkatëshe me zyra dhe konvikte në qytetin Luliang, dhe jo aty ku po nxirrej qymyri, ndërkaq shkaku i zjarrit nuk dihet akoma.
Ekipet e shpëtimit evakuuan 63 persona nga ambientet, 51 prej të cilëve u shtruan në spital dhe vunë nën kontroll zjarrin pasdite.
Videoja e postuar në faqen e mediave sociale “Weibo” tregonte flakë dhe tym të zi të dendur që dilte nga ndërtesa, ndërsa dhjetëra njerëz qëndronin në parking duke parë.
Ndërtesa e shfaqur në video përputhej me imazhet e selisë së kompanisë së qymyrit të postuara në faqen e saj të internetit.
Prodhuesit e qymyrit të Kinës janë nën vëzhgim për një seri aksidentesh në miniera në muajt e fundit, të cilat kanë ndikuar në prodhimin teksa minierat ndalojnë punën për inspektime sigurie.
Në gusht, 11 persona u vranë në një shpërthim në një minierë qymyri gjithashtu në provincën Shanxi.
Një shembje vdekjeprurëse e minierës në Mongolinë e Brendshme në shkurt që la më shumë se 50 minatorë të bllokuar, detyroi prodhimin të ndalohej për një hetim zyrtar, duke shkaktuar humbje të drejtpërdrejta ekonomike prej më shumë se 27.99 milionë dollarë, sipas mediave lokale.
