Gjykata në Pakistan akuzoi sot ish-kryeministrin Imran Khan për nxjerrje të sekreteve shtetërore, një goditje e re për liderin e burgosur që dëshiron të kandidojë në zgjedhjet e vitit të ardhshëm.
Aktakuza i referohet një kabllogrami konfidencial të dërguar në Islamabad nga ambasadori pakistanez në Uashington vitin e kaluar. Khan akuzohet se e ka bërë publike.
Ish-ylli i kriketit u deklarua i pafajshëm, dhe pretendoi se përmbajtja e kabllogramit ishte publikuar më parë në media nga burime të tjera. Dënimi për këtë krim është deri në 14 vjet burg apo edhe me vdekje, sipas avokatëve pakistanezë.
Është hera e dytë që Khan akuzohet për të njëjtën vepër pasi gjykata e lartë më parë kishte rrëzuar aktakuzën për arsye teknike, pasi procedura dyshohet se nuk ishte respektuar.
Khan pretendon se kabllogrami është dëshmi e një komploti nga ushtria pakistaneze dhe qeveria amerikane për ta rrëzuar atë nga pushteti në vitin 2022, pasi ai vizitoi Moskën disa ditë përpara pushtimit rus të Ukrainës. Uashingtoni dhe ushtria pakistaneze i hedhin poshtë këto pretendime.
Ai fitoi zgjedhjet e fundit të përgjithshme në 2018 dhe tani ka disa procese që po zhvillohen kundër tij. Khan i quan ato si një përpjekje për përndjekje politike. Ai tashmë është dënuar për korrupsion me tre vjet burgim.
