Udhëheqësi i Hamasit, Ismail Haniyeh thotë se çdo marrëveshje për Gazën pas luftës që nuk përfshin grupin si dhe fraksionet e tjera palestineze është një “iluzion”.
Haniyeh deklaroi se Hamasi është i hapur për çdo bisedë apo iniciativë me objektivin për t’i dhënë fund “agresionit” izraelit.
“Hamasi është i hapur për t’i dhënë fund ndarjeve politike në Gaza dhe Bregun Perëndimor për të siguruar që ka një rrugë që garanton popullit palestinez të drejtat e tyre dhe një shtet të ardhshëm. Luftëtarët me krahun e armatosur të grupit janë të palëkundur në terren dhe po shkaktojnë “humbje të rënda” midis ushtarëve izraelitë. Së bashku me institucionet ndërkombëtare, Hamasi po përpiqet shumë të përshpejtojë rrjedhën e ndihmave. Grupi është i sigurt se “agresionit brutal” do të marrë fund dhe se “rezistenca” do të vazhdojë të ruajë Gazën.
Hamasi është mirënjohës për qëndrimin e mbajtur nga sekretari i përgjithshëm i OKB-së, i cili vazhdimisht ka bërë thirrje për një armëpushim. Hamasi mirëpret votën e Asamblesë së Përgjithshme të OKB-së për një armëpushim të menjëhershëm”, shtoi ai.
