Mia Shem ishte një nga gratë e rrëmbyera nga festivali Nova që u kthye në një thertore nga terroristët e Hamasit në orët e para të 7 tetorit.
21-vjeçarja, e cila ka dy shtetësi izraelite dhe franceze, u lirua pas 54 ditësh në robëri. Me kujtimet e përvojës traumatike ende të freskëta, artistja e re e tatuazheve foli për makthin dhe agoninë që përjetoi derisa mori frymë sërish e lirë dhe ra në krahët e nënës së saj.
E tronditur dhe me lot në sy ajo ka treguar se si çdo ditë jetonte me frikën se mos e përdhunonin apo vrisnin. Ajo shpjegoi se e vetmja arsye pse terroristi që e mbajti peng nuk e përdhunoi, është sepse në dhomën ngjitur ishte “gruaja dhe fëmijët e tij”.
“Gruaja e tij ishte jashtë dhomës me fëmijët”, tha ajo gjatë një interviste të fundit që u transmetua në televizionin izraelit. “Kjo ishte arsyeja e vetme që ai nuk më përdhunoi”.
“Gruaja e tij e urrente faktin që ai dhe unë ishim në të njëjtën dhomë. Ndihesh sikur dëshiron një përqafim, e di, grua me grua. Por ajo ishte aq e keqe, kishte sy kaq të këqij”, tha ajo.
Shem tha se rrëmbyesi i saj e mbajti atë në një dhomë të errët nën mbikëqyrje të vazhdueshme për pjesën më të madhe të qëndrimit të saj në Gaza. Ajo tha se ishte e uritur dhe e tallur nga familja që e mbante, duke pritur që të vritej në çdo moment.
“Isha e mbyllur në një dhomë të errët, nuk më lejuan të flisja, nuk më lejuan të më shihnin, nuk më lejuan të më dëgjonin, isha fshehur”, tha Shem për Channel 13 të Izraelit. “Ka një terrorist që të shikon 24 orë në ditë, të shikon, të ndjek me sy. Ekziston frika se do të përdhunoheni, ekziston frika se do të vdisni”, tha ajo, duke u shpërthyer herë pas here në lot teksa tregonte makthin që ka jetuar.
Fotot e artistes franceze të tatuazheve Mia Sem 21-vjeçare, e cila u rrëmbye dhe u plagos nga burrat e Hamasit, u bënë virale tetorin e kaluar pas sulmit tronditës në Izrael.
Shem ishte në mesin e më shumë se 200 izraelitëve të kapur gjatë sulmit të befasishëm të 7 tetorit nga Hamasi, i cili vrau 1200.
Shem po merrte pjesë në festivalin e muzikës Nova pranë kufirit me Rripin e Gazës kur sulmuesit sulmuan të rinjtë izraelitë në festival. 21-vjeçarja u qëllua me plumb në krah gjatë depërtimit.
Ajo shtoi se u përpoq të arratisej, por ata qëlluan në makinën e saj dhe i vunë flakën, duke i lënë asaj vetëm dy mundësi në atë kohë. “Ishte një vendim në sekondë nëse duhet të qëndroj atje dhe të digjem apo të shkoj me të”, tha ajo.
